Sifranan di infekshon di COVID-19 ta sigui alarmante:

WILLEMSTAD. - Kòrsou ta pasando momentunan kritiko pa ku presensia di COVID-19. Un situashon ku Kòrsou a dominá ku éksito for di momentu ku a bira konosí ku COVID-19 lo yega Kòrsou, te ku dos siman pasá, despues di un periodo di kampaña polítiko i elekshon. Pa e profeshonalnan den kuido no tin diskushon riba e último, esta ku e loke ku Kòrsou ta eksperensiando aktualmente ta efektonan di elekshon. Den e último 5 dianan tras di lomba Kòrsou a konosé 1.666 infekshon nobo i 14 persona ku a fayesé. Esaki ta hinka Curaçao Medical Center (CMC) den situashon basta kompliká.

Den e dianan tras di lomba por a tuma nota ku e infekshonnan ta un averahe di mas o ménos 333 infekshon pa dia.

For di dia promé di aprel te ku ayera dia 5 di aprel Kòrsou a realisá 6.931 tèst i a konosé 1.666 infekshon nobo.

Den e periodo aki na total tabatin 258 kaso ku a rekuperá. Dia promé di aprel tabatin 103 persona hospitalisá i ayera dia 5 di aprel esaki ta 126 persona hospitalisá. Mester enfatisá ku a trasladá pashènt pa Aruba i Boneiru i esaki a pone ku e kantidat di hospitalisashon aktualmente ta na 126. Kasonan aktivo ta keda haltu na 4.489.

E sifra di persona ku ta fayesé tambe ta un preokupashon i esaki ta reflehá den tur e rueda nan di prensa ku tin. E kantidat a yega na 52 persona ku a fayesé te ku ayera.

Dia promé di aprel 3 persona a fayesé di kua dos ku tabata den CMC i un ku tabata den kas di kuido.

Dia 2 di aprel tabata kuater persona ku a fayesé, tur tabata i interná den CMC i dia 3 di aprel tin dos persona ku a fayesé di kua un di nan tabata den kuido intensivo, miéntras un a fayesé na kas. Dia 4 di aprel tabatin kuater persona ku a fayesé. Ayera dia 5 di aprel kuater persona mas a fayesé, di kua tres tabata den CMC i un den kas di kuido.

Na tres okashon mester a koregí e sifra di infekshon di dia, ora ku dia promé di aprel tabatin un kaso ku inkorektamente a keda registrá positivo i dia 3 di aprel tabatin un kaso positivo ku a keda registrá dos biaha i ayera tabatin un kaso ku a keda registrá positivo inkorektamente.

E situashon di kuido intensivo ta fluktua ku hendenan ku ta fayesé i ku keda trasladá pa Aruba i pa Boneiru. Dia promé di aprel tabatin 34 persona, dia dos di aprel tabatin 36 persona, dia tres 44 persona, dia kuater, 46 persona i ayera dia sinku 37 persona den kuido insentivo.

Total Kòrsou konosé 1.066 kaso positivo i 5.525 kaso di rekuperashon.

Ta spera ku pronto Kòrsou por yega e kantidat di hendenan vakuná ku por pone e situashon aki na Kòrsou poko poko na normalidat.