WILLEMSTAD.- Despues ku EXTRA ayera a mustra riba e porkeria na playa públiko di Sonesta, e departamento di desaroyo di produkto di CTB a pone man na obra mesora i pa ayera tardi tabata manera un otro playa nos a bishitá. A limpia e playa te asta bai den boka di e laman, kòrta mata i e ta bèk na òrdu manera nos kada un tin gana di bishitá un playa i sigur ku nos tin gana ku nos bishitantenan por wak.

EXTRA a papia ku Ritzel Godfried ku ta enkargá ku e departamento di desaroyo di e produkto di CTB i el a mustra kon rápido nan a aktua ora a tuma nota di e situashon na e playa.

Segun el a bisa EXTRA ayera mes a aserka algun kontratista di nan konfiansa i a bai limpia playa públiko di Sonesta i a kambia e chikí di porko ku e tabata i hasié un playa limpi i bunita bèk.

Ayera mes miéntras e kara di e playa tabata kambiando nan a haña hopi reakshon di entre otro e turistanan ku ta keda den Clarion hotel. Godfried a bisa EXTRA ku nan a kap mata, saka sushi asta for di boka di e playa, traha krans rònt di e matanan, duna esakinan awa. Tur esaki segun Ritzel Godfried mester ta den man di LVV. Mirando e situashon di e playa aki i mas playa Godfried ta kere ku su sugerensia na gobièrnu ta pa pasa playanan den mannan di CTB. “Mi ta kere pueblo no meresé e kos aki, si tin mantenshon regular na playanan no por yega asina leu manera e playa públiko di Sonesta”, asina Ritzel Godfried a bisa.

E ta bisa ku miéntras e playanan ta den man di LVV e no por subi tereno di nan. Komo ayera e situashon tabata unu di emergensia e departamento di desaroyo di produkto di CTB a pone man na obra i a bai limpia e playa aki.

“I ami ta reta gobièrnu si nan duna mi e playanan ei pa mantené nan manera mester ta, mi ta reta ku e playanan nunka lo ta sushi”, asina sr. Godfried a bisa EXTRA.

Of mester tin amor pa bo trabou òf lag’é pa otro hende, asina Godfried a terminá bisando den e entrevista ku EXTRA.