WILLEMSTAD.- E proseso pa atendé ku personanan indokumentá ku yega aki na Kòrsou no a kambia. Lo sigui normalmente ku nan detenshon i finalmente nan deportashon. Asina Minister di Hustisia, mr. Quincy Girigorie, a duna di konosé den un entrevista ku EXTRA ayera tardi. Segun sr. Girigorie, e proseso a keda igual na momentu ku detené personanan indokumentá, den e sentido ku ta hiba nan den barak spesialmente destiná pa nan, i ta hasi e trámitenan pa nan keda deportá. Pero esei ta konta tambe pa ilegalnan di otro pais.

Por sierto, siman pasá djabièrnè tabatin un vuelo kaba kaminda a deportá komo 21 persona pa Venezuela, aunke no riba buelo dirèkt. Di mes ta tratando pa hasi esaki ku mas regularidat, pero e ta sosodiendo si. Pero teniendo kuenta ku e no ta sosodiendo ku tantu frekuensia, e búskeda dirigí di hendenan ilegal tambe a baha un tiki, sino hustisia lo keda pegá ku un kantidat di hende sin por akomodá nan.

Segun sr. Girigorie, otro ta si detené un persona ilegal ku a kometé un krímen. Den e kaso ei e lo kana e proseso normal manera ta trata tur otro hende ku kometé un krímen. Solamente den su kaso e lo por rekobrá libertat mas tempran pa motibu ku e ta bini na remarke pa libertat kondishonal. Pero un persona asina no por regresá Kòrsou por lo pronto.

Rol di Konsulado Venezolano:

Nos a puntra sr. Girigorie si Konsulado Venezolano tin ròl den e totalidat, sigur kaminda ta trata ekspulshon di Venezolanonan. El a splika ku, e kontaktonan ku Konsulado t’ei si, aunke e tin di bisa ku e ròl di Konsulado ta limitá. Loke si gobièrnu ta hasi ta pa hala nan atenshon riba nan responsabilidat pa evitá ku mas hende ta sali di Venezuela den forma ilegal pa yega aki.

Es mas, tin kontakto ku hustisia Venezolano i nan ta hasiendo nan parti pa evitá un ke otro.

Pero gobièrnu di Kòrsou mes ta kubri e gastunan pa deportashon, ya ku un persona ku keda aki durante algun dia den barak ta kosta muchu mas tantu ku si kumpra un pasashi pa ekspuls’é.

Mas vigilansia di Wardakosta:

T’asina ku algun tempu pasá a anunsiá ku lo bai tin mas vigilansia di parti di Wardakosta riba laman pa evitá ku mas ilegal ta drenta. Riba e partikularidat aki e minister a splika ku esei ta algu ku ta sosodiendo kaba, i wardakosta ta vigilando nos kostanan durante 24 ora, i esei den koperashon ku Defensa i Milisia di Kòrsou. A hasi esaki pa asina tin sufisiente personal pa por realisá patruyanan di 24 ora.