Haiti: Repúblika Dominikano ta trapa derecho di migrantenan

Santo Domingo.-E situashon na Haiti ta leu for di bon. Konseho Presidensial di Transishon di Haiti a pidi Repúblika Dominikana pa respetá kompromisonan internashonal pa loke ta trata repatriashon i stop e operashonnan brutal di deportá haitianonan for di Repúblika Dominikano. E tenshon pa e situashon sivil na Haiti ta keda unu di preokupashon.

Tin un protokòl firmá entre e paisnan di 1999. E protokòl ta rekonosé ku gobièrnu dominikano tin e derecho legítimo di manda bèk e siudadanonan haitiano indokumentá ku ta den teritorio dominikano, di otro banda ámbos parti ta bai di akuerdo ku ta respetá derecho humano i asina evitá separashon di famianan den e proseso di repatriashon. Haiti ta reklamá ku e akshonnan di repatriashon no mester sosodé den oranan di anochi, ni djadumingu ni riba dianan di fiesta. Haiti ta reiterá su kompromiso na fabor di diálogo konstruktivo pa via diplomátiko, basá riba un polítika di bon bisiña.

E konseho a reuní ku kuerpo diplomátiko pa splika e seriedat di e situashon. Ta papia di hopi violashon i kasonan di abusu ku outoridatnan dominikano lo ta kometé. Pesei Haiti ta pidi apoyo i solilaridat di komunidat internashonal. EXTRA a buska kontakto ku konsul di Haiti lokal, pero e ta realisando un biahe di trabou na e momentunan aki.

...Presidente dominikano Luis Abinader ta papia ku prensa durante un konferensia di prensa huntu ku Sekretario di Estado di Merka, Antony Blinken, na Palasio Nashonal na Sto. Domingo...

Haiti, segun informashon publiká, ta bisa ku nan ta rekonosé e derecho di outoridatnan dominikano pa kontrolá e fluho di migrante pa e teritorio dominikano. Sinembargo Haito ta boga pa atendé e kasonan na frontera segun normanan internashonal. Haiti ta reklamá e echo ku a repatriá muchanan menor di edat sin nan mayornan. Tambe a tuma nota di situashon di trouma físiko serka vários persona ku a keda repatriá.  Segun e konseho, a kita dokumentunan di identidat di vários di esnan ku a keda repatriá.

A ninga representantenan diplomátiko i konsular pa bishitá sentronan di detenshon temporal. CPT ta denunsiá ku Repúblika Dominikano a violá vários konbenio internashonal. Haiti ta mustra ku a base di e protokòl di 1999 e pais na su frontera, Repúblika Dominikano, ta  obligá na permití esnan ku ta keda repatriá pa rekuperá nan pertenensianan. Ademas a deportá alrededor di 3500 persona den oranan di anochi via Belladeres i Ouanaminthe.

Haiti ta preokupá pa e posishon tumá pa e presidente dominikano Luis Abinader ku ke yega na ekspulshon di 10.000 haitiano pa siman pa yega e total di 500.000 haitiano deportá.

Den otro notisia di último ora ta resultá ku Ministerio Públiko a tene un entrada hudisial den e siudat Santo Domingo komo parti di un investigashon di un operashon klandestino riba falsifikashon di dokumentu, supuestamete di haitianonan ilegal. Aparentemente e doctor Frias ta hasi uso di su konosementu di su funshon anterior i tabata ofresé haitianonan pa traha dokumentu ilegal pa nan.

E kansiyer di Repúblika Dominikano Roberto Alvarez di su banda a splika ku su gobiernu ta mandando haitianonan bèk pasobra na promé lugá ya kaba Repúblika Dominikano ta yuda Haiti su poblashon di forma hopi signifikativo. 16% di e presupuesto di salú ta bai pa atendé ku haitianonan. 36% di kamanan di maternidat, pues muhenan haitiano ta krusa frontera ku Repúblika Dominikano i bai duna lus sin paga nada.