WILLEMSTAD.- Gobièrnu di Kòrsou mirando e importansia di deporte pa e komunidat aki ta dunando atenshon na deporte ku aporte konkreto. E prioridatnan ta pa logra mas moveshon den skolnan i pa mehora fasilidatnan deportivo. Prueba di esei ta ku a bolbe pone yerba na SDK despues di daño grandi kousa na e tereno, miéntras ku hasi invershon grandi pa drecha e parti di pisina tambe.

Pa basta tempu muchanan na skolnan di fundeshi no tabata haña muchu moveshon. Den e kuadro aki minister Marilyn Alcala-Walle, enkargá ku maneho di Deporte, Kultura, Siensia i Enseñansa a pone komo prioridat pa logra mas deporte i moveshon den skolnan. E minister ta informá ku esaki no a keda na palabra so pero a duna supsidio adishonal na FDDK pa kubri gastunan di 7 lider di deporte. A kuminsá ku evaluashon di kuríkulo di Enseñansa di fundeshi tambe pa mas edukashon físiko i un estilo di bida mas salu. Ademas ta mehora i mantené e infrastruktura deporte mas mihó. Tin 4 fasilidat deportivo bou maneho di FDDK.

Kasi 1 mion pa vèlt SDK

Den su splikashon na Parlamento minister Alcala-Walle a duna di konosé ku Gobièrnu di Kòrsou mester a bolbe invertí mas ku Fl 700.000.00 na 2016 pa drecha e vèlt di bala na Sentro Deportivo Kòrsou despues di e konsierto di Color Events. E vèlt a keda totalmente destruí i mester a bolbe paga pa pone yerba nobo. E trabounan di restourashon a kaba na aprel último. Ta bon konosí ku despues ku e pisina a haña un bon upgrading gobièrnu a pone kurá duradero pasobra vandalistanan a destruí un parti konsiderabel na SDK despues ku a renobá e pisina. Alabes gobièrnu a sòru pa kámaranan di vigilansia na SDK pa protekshon adishonal. Gobièrnu tin alabes e trabounan di panel solar den fase di preparashon. Finalmente ta trahando riba materialnan pa praktiká deporte na SDK

Sobra plaka pa sentro Barber

Pa loke ta trata e stadion di Rif/ pisina Rif ta asina ku e ‘pomphuis’ na pisina di Rif tin mas di 20 aña i aki ta bai remplasá e ‘pomphuis’. A pidi ofertanan kaba i den un tempu korto ta kuminsá ku e trabounan na Rif. E sentro multifunshonal di Barber ta den desaroyo. Dentro di poko ta depositá e siguiente tranche di plaka pa trabounan por kontinuá. Finalmente e kompleho deportivo na Suffisant, e minister ta splika ku tin un proposishon pa sera e sala kompleto di moda ku por praktiká mas deporte, manera e.o. vòli.