WILLEMSTAD.- Debí na krísis di COVID-19 rònt mundu ekonomia a kremp. Asina ofisina Sentral di Statistik (CBS) na Kòrsou a duna di konosé djaweps último. Na nos pais e ekonomia a kremp ku 18.4 porshento den aña 2020. Ekonomia mundial a kremp 3.3 porshento, segun CBS. Den aña 2019 ekonomia a oumentá 2,8%.
E bahada di desaroyo ekonomia ta hopi visibel den Latinoamérika i tambe region Karibense. Den e region por a mira den aña 2020 un bahada promedio di 7,7 porshento. Pero e diferensianan entre e paisnan ta grandi. Segun data di ‘Economic Commission for Latin America and the Caribbean’ (ECLAC) ekonomia di Colombia a baha ku 7 porshento den aña 2020. Pero ekonomia di Venezuela a baha ku 30 porshento. República Dominicana a konosé un oumento negativo di 5.5 porshento, Jamaica a keda konfrontá ku un bahamentu di e kresementu ekonómiko di
9 porshento. Ekonomia di Barbados a baha ku 16 porshento.
Segun sifranan di ECLAC e desaroyo ekonómiko na Kòrsou ta riba mesun liña ku hopi otro pais den region Karibense. Tin diferente pais ku konosé un bahamentu di mas ku 10 porshento, i algun di nan a konosé un bahamentu di mas ku 20 porshento.
Pero si bo ta wak e desaroyo durante mas aña, ta opvio ku situashon na Kòrsou ta hopi malu kompará ku otro pais den region Karibense. Data históriko ta mustra ku kresementu di Kòrsou entre 2010 i 2020 ta hopi abou.
Segun CBS un kresementu ekonómiko abou ta nifiká ku tin ménos bienestar pa mantené poblashon di Kòrsou, pa kombatí pobresa i pa realisá ophetivo di nos klima.
CBS den un artíkulo ku ta yama “Economische
ontwikkeling 2020: een economie onder druk”, i ku ta publiká riba wèpsait di CBS, ta bisa ku Kòrsou no por kumpli ku su prosperidat i su bienestar si nos no tin mas desaroyo ekonómiko. CBS ta enfatisá tambe ku sin desaroyo ekonómiko Kòrsou no por kumpli ku su obligashon sosial.
Relashoná ku otro pais den e region Karibense Kòrsou a konosé un desaroyo paralelo den añanan 2010, 2011, 2015 en 2020. Den e otro añanan (2012, 2013, 2014, 2016, 2017, 2018 i 2019) por a mira ku e desaroyo na Kòrsou tabata mas negativo.