WILLEMSTAD.- Tur esnan ku diariamente ta trafiká den área di koredor sea pa hasi ehersisio òf pa disfrutá di nos naturalesa, por a tuma nota di desaroyonan positivo den e área.

Ya tin algun dia ku trahadónan ta trahando algun banki di betòn den e área. Aparte di esaki ta trahando algun plenchi masha bunita. Esaki lo por sirbi pa kualke selebrashon familiar òf algu otro. EXTRA a komprondé ku ta masha hopi plan tin riba mesa pa ku desaroyo den e área. Pronto e lo bira un área agradabel pa famia i amigunan bai sinta kombersá, sosialisá i disfrutá di nos naturalesa. Ta spera ku pronto e trabounan finalisá pa asina un i tur por bai disfrutá di e área bunita desaroyá. Ta di mas hasi apelashon na komunidat pa kuida e fasilidatnan na Koredor. Ta pa pueblo e ta.