WILLEMSTAD.- Korte di promé instansia durante tratamentu di kasonan di mula, a kondená un akusado femenino na 6 luna di prizòn.

E ta keda akusá di a trata na eksportá  un kantidat di 749 gram di koka pa tera friu, den su “handbag”. E akusado no a presentá pa tratamentu di su kaso.

Durante un kontròl na Hato, e personal di duana a deskubrí e droga den “handbag” ku tabatin un bon falsu. Na polis e akusado a bisa ku e tabata sa ku ta droga e tabata transportando.

Segun e akusado, e tin yen di debe, yu pa kria i no tin un trabou fiho. Durante pandemia el a pèrdè trabou i a buska tur kaminda sin por haña.

Esei a pone ku el a desesperá i disidí di tuma e oferta pa e por bai pasa droga. Segun e akusado, el a haña e droga serka un persona ku el a konosé na un hasimentu di aña.

Despues di a splika e persona su situashon, esaki a dun’e e oferta di kual el a bai di akuerdo kuné mesora, pasó e tabatin mester di sèn pa sali fo’i su situashon.

El a bisa ku e no ke menta nòmber di e persona, pa e no hinka su mes den problema.

Segun e akusado, e persona lo mester a kumpra e ticket pe i tambe a sòru pa e droga den e maleta. Ora e yega Hulanda, e lo a haña sèn pa e trabou, pero e no tabata sa kuantu.

Fiskal a duna di konosé ku no ta promé bes ku e akusado aki, ta kai sera  pa lei di opio. Nan aña  2010 i tambe 2012 tambe el a hañ’e den man di hustisia pa e mesun akto.

Fiskal a hasi un demanda di 12 luna di kual 6 kondishonal.

Wes no ta mira niun motibu pa desviá for di e demanda di fiskal. E  ta un residivista i tabata sa presis kiko e tabata hasiendo.