WILLEMSTAD.- Ministerio Públiko durante kasonan di mula, a akusá e hòmber R.E. (29) di kier a transportá un kantidat di 807 gram di koka pa Hulanda, den rantnan di su maleta. R.E. su kaso a keda tratá den su ousensia.

Segun e prosèsverbal e akusado a yega Hato ku e intenshon pa biaha pa Hulanda.

Durante kontrol, e personal di duana a ripará ku su maleta tabata hole straño i tabata pisá. Despues di a kontrolá e maleta a bora e rantnan i a haña e droga na pasta den plèstik.

E akusado a atmití su kulpa i a bisa ku e kier a transportá e droga pa 4 mil euro.

El a splika ku e tabatin un kontrakt di trabou ku tabata yegando su fin i no tabata sa si nan lo a sigui kuné òf mand’e kas. Despues ku COVID a dal aden, nan a bis’é ku nan no por alargá e kontrato mas.

Esaki a pone kai den desesperashon i a bai di akuerdo ku algun persona pa transportá e droga.

Fiskal a duna di konos’é ku en bèrdat riba merkado e kantidat di plaka ku e akusado a menshoná ku e lo a haña, ta kuadra mas o menor ku e kantidat di droga ku e tabatin den su poder.

Fiskal a haña e akusashon probá i ta demandá e akusado na 12 luna di kual 6 kondishonal.

Abogado di e akusado a bisa den su defensa ku su kliente tabata hopi desesperá, pa motibu ku aparte ku el a keda sin trabou, su señora ta bai haña un baby.

E akusado a laga su abogado  pidi korte un chèns i a bisa ku e tin hopi duele di lokual ku el  a hasi. El a bisa ku su kliente a ninga promé, pero ora ku su kontrakt a keda terminá, e mes a aserka e hendenan i disidí di  bai di akuerdo pa transportá e droga.

Hues den su desishon, no a mira motibu pa desviá for  di e demanda i a bai kompletamente di akuerdo ku  fiskal.

 

LAGA UN KOMENTARIO

Please enter your comment!
Please enter your name here