WILLEMSTAD.- Korte di promé instansia ayera a duna dos trahadó di un kompania ku ta entregá karni na supermerkadonan chèns den un kaso penal, ku nan ta keda akusá di dje.
Ámbos ta keda akusá ku dia 12 di ougùstùs último nan a hòrta algun palèt di karni pa pa nan hasi nan propio ganashi.
Ambos akusado a presentá ayera den sala di korte pa responsabilisá nan mes pa nan akto.
Ta trata di G.L.(33) i J.A (30).
Tur dos e akusadonan a aseptá nan kulpa. Hues a splika ku nan a tuma e karninan topa otro hende un kaminda saka e karninan hinka den un otro vèn ku e intenshon pa bende e karni i repartí e sèn den nan dos.
E akusado G.L. a bisa ku e tin hopi duele di loke el a hasi.
El a konta ku e ta tata di 4 yu i ku esun di su señora ta 5 yu. Tabata nèt algun dia promé ku skol a habri i tabatin mester di sèn pa kumpra kos pa su yunan bai skol.
El a pidi su trabou pa fi’é 1000 òf 1500 florin pero nan a ning’é.
El a bisa ku e ta un trahadó ku ta traha ku hopi sèn tur dia despues ku e hasi entrega, pero nunka el a mishi ku sèn.
Semper e tabata trese e plaka intakto manera mester ta.
El a preferá di pidi i no kue. Apesar ku e tabatin 11 aña trahando e trabou ei bou di 2 diferente doño, gerensia e ning’é e sèn.
Mirando ku skol tabata na punto di habri, su yunan no tabatin nada ainda, el a kai den desesperashon i bin ku e idea pa kue e karninan.
Riba e pregunta di hues na e akusado ku no tabatin niun famia pa yud’é, el a bisa ku su mama ta kobra ònderstant i su tata no a wòri kuné i nunka a kri’é.
Pa loke ta trata e akusado J.A., e tambe a bisa ku e sumamente arepentí di loke el a hasi.
El a splika ku e no tabatin kaminda pa e haña sèn pa kumpra kos pa su yunan. Su kasá su sèn no tabata yega. Nan a kaba di hasi hipotek pa kumpra kas i p’esei e no por a bai banko mas pa hasi fiansa pa aworakí.
P’esei e tambe a kai den desesperashon i tentashon i a bai di akuerdo pa kue e karninan, bende nan pa e por a haña un tiki sèn. El a bisa ku e ta sumamente arepentí di loke nan a hasi. E no tin trabou i tin e hopi duru.
Su kasá so no por kubri e gastunan.
Fiskal durante su rekisitorio a haña e akusashon kompletamente probá.
Fiskal a bisa ku e trahadónan a tacha e konfiansa ku tabatin den nan relashoná ku loke nan a hasi.
Segun fiskal e lo tene kuenta ku e situashon personal di e akusadonan, p’esei e no ta haña nesesario pa e manda nan bèk prizòn.
Nan tabata sinsero i a koperá ku e investigashon.
Pero fiskal ta haña ku nan mester sinti si loke ku nan a hasi.
P’esei el a yega na un demanda di 180 ora di trabou pa komunidat, mas 6 luna di kastigu kompletamente kondishonal.
Abogadonan mr Gomez i mr Moenir Alam tabata esnan ku a hiba defensa pa e akusadonan.
Hues de Kort den su desishon a bisa ku e ta haña e akusashon probá, pero ta desviá for di e demanda di fiskal i a redusí e kastigu. Hues a yega na un kondena di 160 ora mas 3 luna kondishonal pa ámbos.