WILLEMSTAD.-Den un karta ku ta den poder di EXTRA, e sekretario di estado drs. Raymond Knops ta informá Tweede Kamer (Parlamento ulandes) ku despues ku e komishon di evaluashon a kaba ku nan trabounan nan a konkluí ku mester kontinuá ku supervishon finansiero pa Kòrsou i St.Maarten. Manera ta konosí ku nasementu di paisnan outónomo den reino Kòrsou i St.Maarten mesora tur e partidonan na mesa a bai di akuerdo ku mester bini un supervishon finansiero pa asina tene mihó kontrol riba maneho finansiero riba e paisnan aki. Partikularmente Kòrsou ku a haña saniamentu di debe a haña tende ku mester hiba un maneho mas den ekilibrio pa no hipoteká futuro di e generashonnan ku ta bini.

Den un karta di awe 16 di yanüari 2019 Knops ta informá Tweede Kamer ku a instalá un komishon di evaluashon Rijkswet Financieel Toezicht dia promé di òktober 2018. E tarea di e komishon tabata pa duna un konseho manera stipulá den artíkulo 33, insiso 6, 9 i 10 di e lei di konsenso di reino ku ta trata supervishon finansiero pa Kòrsou i St.Maarten.

E komishon a yega na e konklushon ku Kòrsou i St.Maarten no a kumpli ku normanan di presupuesto pa loke ta trata e periodo 2015-2017. A base di esaki e komishon ta yega na e konklushon ku mester mantené supervishon finansiero pa ámbos pais. Pues no ta hustifiká pa kita e obligashonnan ku e lei di Reino ta pone. E komishon di evaluashon a duna sinku rekomendashon na e paisnan pa nan kumpli kuné ku bista riba e próksimo evaluashon.

A base di e puntonan menshoná Konseho di Minister di Reino ta disidí pa kontinuá ku CFT tantu pa Kòrsou komo St.Maarten. Mas detaye den próksimo edishon di EXTRA.