Hospital CMC reklutando enfermera general i spesialisá awor!

WILLEMSTAD.-E situashon di Covid tin su impakto riba hospital CMC. E ta di tal forma ku Curaçao Medical Center a pidi asistensia di ministerio di salubridat di Ulanda pa nan manda enfermeronan general i spesialisá i den mesun rosea a pidi pa manda spesialistanan médiko tambe pa asistí den CMC. Na palabra Germaine Gibbs bosero di CMC den deklarashon na EXTRA kende a splika ku ya kaba nan a alerta gobièrnu di e situashon ku ta reinando. Loke CMC su gerensia a kuminsá hasi kaba ta tuma kontakto ku Ulanda pa pidi asistensia. Manera indiká ariba CMC ta buska asistensia di enfermeranan general i spesialisá i tambe spesialistanan médiko pa asina nan ta prepará. Te na e momentu aki CMC por atendé e kasonan, pero den forma di prevenshon a pidi e asistensia. CMC ta reklutando enfermeronan general i spesialisá lokalmente tambe.

Desishon ku CMC a tuma awe djaweps, kontrali na e situashon di e dia anterior, ta ku ta stòp TUR operashon elektivo. CMC ta yamando pashèntnan pa avisá nan di e desaroyo nobo aki. E motibu ta ku hospital ta spar espasio pa den kaso ku situashon mester presentá ku tin mester di espasio/kama pa kasonan ku presentá. Ta p’esei ta buska ‘back-up’ for di Ulanda.

Kasonan di Poliklínika si ta sigui, asina sra. Gibbs a bisa. Ayera CMC tabatin 7 pashènt di Covid pa awe el a baha na 5 ya ku dos a bai kas, pero e ta keda un proseso dinámiko.

Riba e pregunta si ainda tin e kamanan disponibel den Sehos sra Gibbs  a bisa ku esei ta gobièrnu por bisa algu di dje. Mester tene kuenta ku si Sehos tin kama disponibel, lo mester manda personal pa atendé ku e kamanan ei!