WILLEMSTAD.- Plataforma Diálogo Nashonal “Kòrsou ta Avansá” a reuní dia 5 di yüli último, i spesífikamente a trata e tópiko Feffik. A yega na e konklushon ku ta disolvé loke ta konosí awor aki komo Feffik. E partnernan tripartit a yega na 11 punto ku ta enserá ku ministerio di Enseñansa, Siensia, Kultura i Deporte meskos ku ministerio di Bienestar, Asuntunan Sosial i di Labor huntu ku SIGE i otronan lo ta embolbí pa kristalisá e plannan nobo.

Plataforma Diálogo Nashonal ta un kombenio tripartit konsistiendo di sektor Sindikal, sektor Empresarial i Gobièrnu,  kaminda e partnernan ta diskutí i dialogá pa yega na kònsènsùs riba diferente punto di vishon i di maneho general kon Gobièrnu, sostené den konsulta ku e dos otro partnernan ta bai ehekutá su maneho.

Manera ta konosí Feffik a bira un problema serio ora ku e ideanan di gobièrnu pa ku e instituto di Enseñansa a bira konosí.

A tuma desishon ku riba término mas pronto posibel lo disolvé e entidat hurídiko Feffik. Na di dos lugá ministerio SOAW lo presentá, den konsulta ku e partnernan den Plataforma un proposishon pa un Instituto nobo di formashon di fishi. Na di tres lugá, ministerio di Enseñansa, Siensia, Kultura i Deporte a duna un presentashon di e trayekto ku lo enkaminá pa ofresé enseñansa sekundario di kalidat i ku ta ekitativo, teniendo kuenta ku e nesesidatnan di kada alumno. Ya ta trahando riba un dekreto ministerial pa den aña eskolar benidero ofresé studio na nivel SBO den áreanan di ‘Nautica’, ‘Koeltechniek’ i ‘Autotechniek’ den e edifisio di Colin Valerian.

For di e punto di bista ku formashon di fishi ta un mester pa alumnonan ku no ta den enseñansa regular, lo ofresé trayekto di fishi ku sertifikashon den diferente área pa e aña benidero 2018- 2019, e.o pa mètslá i karpinté tambe na lokalidat Colin Valerian na Brievengat.

Banda di instrukshon tékniko, alumnonan lo haña guia i coaching di Sentro pa Inovashon I Edukashonal (SlGE) den diferente área. SIGE tin na su enkargo e proseso di inskripshon sentral i ‘screening’ di e studiantenan pa por referí studiantenan na un estudio i skol ku ta kuadra ku nan nesesidat.

Den Diálogo Nashonal tambe a yega akuerdo ku Ministerio di Desaroyo Sosial, Labor i  Bienestar lo inisiá e trayekto pa bini ku e Instituto Nashonal di Formashon di Fishi (Nationale bedrijfsschool) riba término kòrtiku. Un komishon di Ministerio di Enseñansa, Siensia, Kultura i Deporte, Ministerio di Desaroyo Sosial, Labor i Bienestar i Ministerio di Desaroyo Ekonómiko lo traha riba e kuadro pa e Instituto Nashonal di formashon di fishi aki ku embolbimentu di partnernan sosial.

Lo pèrkurá pa e trayekto pa lanta e instituto aki kana aselerá den aña benidero, pues den e siguiente reunion lo presentá un planifikashon di tempu na Plataforma Diálogo Nashonal.

Miéntras tantu gobièrnu ta sigui ku e proseso pa instituí un Konseho di Enseñansa i Merkado Laboral (ROA - Raad voor Onderwijs en Arbeidsmarkt) i publiká un Registro Sentral di tur skol i institutonan rekonosé dor di gobièrnu.

Gobièrnu tin intenshon di instituí un entidat pa hasi e tarea ku ántes KBB tabatin na su enkargo pa prepará kompanianan i empleadonan pa duna guia na boka di trabou.

Na fin di  e di dos siman di yüli lo presentá loke a keda akordá na Diálogo Nashonal den  un plan total. Lo deliberá riba e plan ku diferente stakeholders, inkluso alumnonan, maestronan i mayornan.

Komo último punto, pa e periodo transitorio entre likidashon di FEFFIK i lantamentu di e instituto nobo Gobièrnu i su ministerionan envolví  huntu ku e organisashonnan di sindikatonan partnernan di Plataforma di Diálogo Nashonal tambe lo dediká atenshon na evaluashon di posishon i guia pa reedukashon di maestronan ku ta laborá aktualmente den FEFFIK.