No opstante el a sali liber di kaso Hato Shooting...

WILLEMSTAD.- Urvin Wawoe alias “Nuto” awe mainta a tende wes mr. Paul Waarts dikta un sentensia di bida largu pa su ròl den e sonado kaso konosí komo “Themis”. I esaki a kai no opstante ku wes a konsiderá ku e ta sali liber dje kaso konosí komo Hato Shooting, pa falta di prueba. E magistrado a konsiderá ku Nuto tabata lider di un organisahon kriminal, den e kaso aki NLS ku a lanta den e bario di Koraal Specht. E tabata komplise den un kantidat grandi dje likidashonnan na St. Maarten, i esaki despues di a asesina su amiga Latoya. E tempu ei e tabata hopi rabiá i asta a duna instrukshon for di den prizon unda e tabata sera. Pa loke ta e kasonan di trafikashon di droga, segun wes Nuto tabata debidamente envolvi, i ku e pruebanan ei a bini a base di su kontaktonan via Sky ECC.

Manera ta konosí, Ministerio Públiko a pidi bida largu pa Nuto. E veredikto aki ta bini despues di mas ku dos luna i mei ku e wes a tuma su tempu pa studia e kaso i yega na un desishon. Tratamentu dje kaso aki di Nuto (44) a kuminsá dia 23 di yüni 2025 i terminá 3 di yüli. Durante dje kaso aki ku a ser tratá den un sala spesialmente montá na Marine Kazerne na Suffisant, Nuto a konta ku defensa di tres abogado, enkabesá pa Alicia Blonk, miéntras ku Ministerio Públiko tambe a konta ku tres fiskal, kendenan a preferá di keda anónimo.

Nuto a ser akusá di un kantidat di likidashon tantu na St. Maarten komo na Kòrsou, di kual esun mas konosí tabata Hato Shooting den kual tantu Erwin ‘Jais’ Juliana komo Shently ‘Champi’ Arnhem a pèrdè nan bida. Aparte djesnan menshoná tabatin un kantidat di turista na airopuerto ku a keda heridá na diferente parti di nan kurpa. Nuto a nenga te na morto ku e lo ta miembro di e gèng “No Limit Soldiers” (NLS) i ku e lo tabatin algu di haber ku e likidashonnan na Hato. Tambe el a nenga e kasonan di matamentu na St. Maarten, por sierto despues ku su pareha Latoya a ser asesiná.

Nuto a ser konfrontá ku diferente akusashon relashoná ku trafikashon di droga. Den e kasonan aki a nòmber di Tyson Quant a kai, pero aki Nuto a opta pa tene su boka hermétikamente será hasiendo apelashon riba su derechi di keda ketu. Tyson ta ser konsiderá e kabesante di NLS. Pero ku e sentensia aki ta di spera ku lo tin apelashon.