WILLEMSTAD. - Un apikultor ku tin su krio di abeha den área di Seri Loraweg a haña sorpresa ora ku el a yega su krio, el a tuma nota ku tin tres kaha di abeha ku abeha morto aden. Mesora el a chèk wak kiko por a pasa ku su abehanan, el a tuma nota di un líkido bashá riba e kahanan ku a pone fin mesora na e abehanan. Tabatin abeha aden i tin ku ta bai i regresá. Esunnan ku a regresá a muri mesora. Esaki ta nifiká un pèrdida grandi pa e apikultor ku ta sòru pa un produkshon supstansial di honing.

Di e forma aki a bai sigur hopi honing pèrdí, sigur 30 galòn di honing, nèt den un periodo ku honing ta skars. E apikultor no sa ken a hasi e kos aki, pero hendenan den bisindario a mira algun mucha ta tira e kahanan ku piedra, e no sa si ta e mesun muchanan aki a bin ku un líkido venenoso i basha riba e kahanan. E líkido ta parse un venenu hopi fuerte pa motibu ku asta e yerbanan kaminda ku e líkido a basha a muri. E apikultor tin di tira e kahanan aki afó i traha nobo, pero den su deklarashon ayera na EXTRA, el a duna di konosé ku e no tin muchu ánimo mas pa sigui traha honing.