WILLEMSTAD. - Awe den oranan di mardugá, sentral di polis a risibí notifikashon ku tin un outo na kandela den e área di Roi Catochi. Na momentu ku tantu polisnan i tambe unidat di Brantwer di Rio Canario a yega na e sitio a topa ku un vehíkulo kompletamente na kandela. Brantwer a paga e vehíkulo aki.

Investigashon durante di e último oranan a determiná ku ta trata di vehíkulo di un wes ku a keda pega na kandela awe mardugá. Informashon adishonal den e kaso ta indiká ku e wes aki algun dia atras tabata víktima di deskonosínan ku a basha bala riba su vehíkulo i awor awe mardugá vehíkulo ta keda kima, probablemente di forma intenshonal. Esaki a pone ku hinter e kadena hudisial ta vigilando e situashon aki hopi di aserka pa detené esnan kulpabel den e akto aki.