WILLEMSTAD.- Despues di 11 aña EXTRA ta bai adaptá preis di korant. E último bia ku a adaptá e preis di korant EXTRA tabata yanüari 2012. Den último 11 aña EXTRA a eksperensiá subida di preis di produktonan primario manera papel, plachi aluminio i enk. Pero último añanan tabatin un eksploshon den preis debí na covid i guera na Ukrania. Tur esakinan tabatin influensia riba produktonan pero tambe servisionan. Gastunan den eksterior manera transporte di kònteiner/barku tur a subi drástikamente i tin nan efekto riba e imprenta di e produkto final, e korant EXTRA. Na yanüari 2022 ya tabatin un oumento den preis di imprenta basta drástiko pa e motibunan ya menshoná. Na e okashon ei EXTRA a disidí pa supsidiá e oumento mirando ku a kaba di sali for di e krísis di covid. Awor entrante 3 di aprel 2023 ta bin otro oumento di preis di imprenta. Tur e faktornan aki ta pone ku gerensia di EXTRA ta introdusí kambio di preis di korant entrante djaluna 3 di aprel próksimo. E preis nobo ta bira Fl 2.00 pa korant.

E famia di EXTRA ta sumamente gradesido ku na mes momentu su lektornan ke sigui risibí nan korant den nan man. EXTRA tin e kompromiso ku su lesadónan na Kòrsou, Boneiru i rònt mundu pa sigui presentá un produkto periodístiko responsabel i konfiabel.

Nada no a keda meskos den último dékada, esei ta sigur. Esaki ta konta pa korant EXTRA tambe. EXTRA a bin ta desaroyá i pèrkurá pa via di su plataforma digital kubri mas notisia i trese esakinan pa tur nos lektornan riba telefòn, tablet òf kòmpiuter. E kombinashon di papel i digital ta keda importante pa e empresa bayendo dilanti. Danki tambe na nos 120 mil siguidónan riba Facebook, Instagram, Youtube i wèpsait ku tur luna ta generá kasi 3 mion ‘views’.

EXTRA ta yama danki na komunidat di a sostené e korant aki pa 47 aña. Nos ta sigui hasi máksimo esfuerso tur dia pa garantisá un korant ku kontenido di notisia konfiabel na papiamentu.

Último biaha ku tabatin oumento di preis tabata na 2012: