WILLEMSTAD.- Despues di 13 aña Gobièrnu di Kòrsou i LVV a buska bestia nobo pa mehora e rasa di bestia lokal. Ayera riba un buelo di karga for di Merka, a yega 46 Kabritu i karné di diferente rasa. E intenshon mayó ta pa drecha e rasa di bestia lokal. Lo bai hür chubatu pa asina rasa ku kabritu lokal.

Aparte di esaki, kriadónan di bestia lokal por bin ku nan animal, skohe un chubatu na LVV, pa asina laga nan animal par ku esaki. E bestia lo mester keda 21 pa 30 dia pa asina sigurá ku el a pega bon. Despues di mas o ménos 5 luna lo por tin lamchi nobo. Awor ku e animalnan a yega, nan lo keda mas o ménos 40 dia den karentena i despues lo hasi un tèst di sanger ku nan. Ora nan hasi entre 8 pa 12 luna na Kòrsou, pa komienso di otro aña lo kuminsá dèk i pa òktober lo por tin benta Si tur kos ta bon, nan lo bai nan sitio kaminda nan lo biba.

Ta e intenshon pa den futuro bolbe purba bini ku otro tipo di kabritunan di otro rasa mirando ku esaki por ta un futuro bon pa kriamentu di bestia. E lo por ta ekonómikamente di gran balor. Lo tin bestia tur dia pa mata na abatuar i esaki ta nifiká ku lo tin karni di kabritu i karné lokalmente produsí.

Na yegada di e animalnan ayera, tabat’ei diferente representante di Ministerio di Salubridat i LVV i tambe Señora Lizaima Da Costa Gomez den representashon di Minister di Salubridat.