WILLEMSTAD.- Djárason binidero Korte di promé instansia lo trata e aksidente tristu i lamentabel kaminda un mama i su beibi di 1 aña a pèrdè nan bida den tráfiko, aña pasá e promé dia di skol.

Dia 16 di ougùstùs 2019  tabata un di e fechanan mas ku a keda marká komo un página skur riba Kòrsou.

Esaki debí na e aksidente di tráfiko ku a tuma lugá mitar di 7 mainta na Helmin Magno Wiels Boulevard altura di De Savaan ku a konmové henter Kòrsou.

Na yegada di e unidat, nan a topa un mama i yu ku tabata gravemente leshoná.

For di investigashon preliminar ku polis a realisá na e sitio, a sali na kla ku e mama ku na e momento ei tabatin e yu den su brasa, a bai krusa kaya, nèt ora ku un vehíkulo tabata aserkando, biniendo for di Julianadorp bayendo direkshon di Otrobanda.

E vehíkulo a alkansá ámbos víktima. Alrededor di mitar di ocho di mainta, dòkter di polis a konstatá morto di e mama i su yu ku a fayesé na e sitio di aksidente.

Ta trata di Julianne Maria Joe, nasé dia 15 di novèmber 1999 i Giun-drick Joe, nasé dia 10 di febrüari 2018, ámbos nasé  Kòrsou.

Polis a detené e shofùr, J.O.C., di 39 aña, i a konfiská e vehíkulo.

Segun vários testigu ku tabata na e sitio, e shofùr  lo tin kustumber di kore di un forma hopi iresponsabel.

Nan a bisa ku e tabata kore di un forma hopi iresponsabel for di riba kaminda di Bándabou.

E shofùr a keda será pa algun dia, pero despues a keda laga den libertat pendiente pa su kaso den korte. E kaso lo keda tratá despues di 1 aña i nèt 3  luna. Lei hopi bes ta konsiderá aksidentenan asin’aki komo un fayo den tráfiko. Den e kaso spesífiko aki no sa kiko korte lo bai husga.