KRALENDIJK – Boneiru a
keda den shòk despues ku den
apénas 24 ora dos morto
violento a kai debí na uso di
arma di kandela. Djamars
mardugá un dama venezolano
a pèrdè su bida den un kaso
ku ta parse suisidio, pero ta
tene kuenta seriamente ku
homisidio òf asesinato,
teniendo kuenta ku no por a
haña e arma ku a dispará e
proyektil den su su kabes.
Ayera mardugá otro kaso
violento ku morto komo
konsekuensia. Aki sí ta papia
di asesinato.
Komentarionan riba kaya i
media sosial no ta laga duda
ku Boneiru ta den shòk e siman
aki. Tur hende ta lamentá loke
ta sosodiendo. Un persona ta
skirbi riba facebook: “Hopi
lamentabel. Mi no ta mir’é
komo Boneiru isolá, pero den
e kuadro di henter nos region,
sigur islanan ABC ku mester
kuminsá deliberá ki medida
tuma pa entre otro entrada
ilegal di hende i artikulonan.
Tambe nos mester kuminsá
papia na forma mas dirigí i no
na ‘low pitch’ riba e resultado
di mas i mas droga den nos
komunidat i e realidat
mundial.”
Tristu
Otro reakshon: “Tristu ami
ta sinti pa famia di e
personanan ku a pèrdè nan bida
di un manera tan kruel, pero
mi ta sinti tambe duru pa
motibu ku e isla aki ta asina
chikitu anto kon lihé e kosnan
aki ta plama rònt mundu.”
“Ta un echo ku nos ta biba
den e último dianan di e mundu
malu aki i e kosnan aki ta
sosodé. De 2 Timoteo 3:1-5 e ta
profetisá ku asina hende lo bira
den e tempu aki. Si hende ta
studia beibel i komprondé e
situashon no ta sorprendé loke
ta pasando.”
Hopi robes
“Algu ta bayendo hopi robes
na Boneiru. Atrobe un
poblashon di apénas 20.000
habitante. Kon por ta ku no por
kontrolá kriminalidat? Algu
masha simpel ku ta kapta mi
atenshon semper ku mi ta na
Boneiru ta ku su kayanan ta
skur. Grupitunan ku ta sinta i
bo no ta wak nan kara, komo
no tin bon iluminashon.”
E mesun persona ta sigui:
“Tambe mi a komentá un bia
kaba ku mi ta haña ku Boneiru
su poblashon a kambia hopi
mes. Hóbennan ta manera sin
rumbo... Gròf! Mayornan no tin
kontròl mas di nan yunan? No
ta siña nan for di chikitu e
diferensia entre bon i malu i no
ta lanta nan ku norma i balor.
Sali di kas nèchi bistí.
Komportá bo mes. No hinka bo
kurpa den kosnan ku no por
mira lus di dia etc.”
Lamentabel mes
“Kasonan hopi lamentabel
mes. Un mama di famia ta
pèrdè su bida i awor un hóben.
E mundu di awendia no ta
tolerá, legumai problema etc
etc. Selos ku ta dominá etc.
Ami ta mayor i no ta tur ora
mayor tin fout den akto di nan
yunan. Tin bia pa kon bon kriá
ku bo a lanta bo muchanan,
nan mester ta mentalmente
fuerte pa ora nan topa ku e
mundu eifó”, un señora ta
komentá.
E mesun persona ta bisa ku
hopi hende ta mira kos i tin
miedu di denunsiá pa
represaya etc. “Ban kuida nos
Boneiru. Polisnan kuminsá
buta kontròl sin avisá, pa asina
kuminsá kita algun arma for
di kaminda.”
Kambio
“Mi a nase na Kòrsou, pero
mi stima Boneiru i kada fakansi
mi ta na Boneiru. Mi tin 32 aña
ta biba i traha na Hulanda. Mi
ta mira ku Boneiru a kambia.
Hopi turista i hopi edifisio nobo
etc. Gobièrnu mester yuda
hóbennan ku trabou, pa asina
nan por ta ehèmpel positivo pa
otro. Kosto di bida ta hopi
haltu. Mester chèk esei. Hopi
hende ilegal bibando aki na
Boneiru. Esei tambe mester
traha ariba. Boneiru mester
uza tur rekurso ku por uza pa
kriminalidat no sali for di man.
No warda baka hoga na pos.
Kuminsá aworaki ku akshon”,
un persona ta opiná.

Suisidio mas i mas den direkshon di asesinato

KRALENDIJK.- Mas i mas e posibel kaso di suisidio ku a tuma lugá den Kaya Irma, Antriol Pariba, ta birando un kaso di asesinato. Tin un hòmber detené komo sospechoso den e kaso aki, ku mientrastantu a haña e nòmber di Alamo. Un señora venezolano ta víktima. A hañ'é ku un perforashon di bala den kabes.

For di kuminsamentu kaba polis a pensa den direkshon di un kaso di asesinato òf homisidio i no suisidio. Ta konosí ku no a haña niun arma di kandela banda dje kurpa di e víktima. A detené tambe e hòmber di inisial C., miéntras ku a disidí di manda e kurpa di e dama Ulanda pa investigashon na NFI. Aki lo por determiná ku por papia di suisidio òf asesinato.

Ayera polis a bai buska e arma ku a usa den Antriol. No a haña sinembargo e arma aki ainda. A hasi uso tambe di kachó spesialisá den e búskeda.

Pa loke ta trata e otro kaso di asesinato di ayera mardugá polis tabata hopi okupá ayera ku investigashon. No ta konosí ku si e kaso ei a haña nòmber kaba.