WILLEMSTAD.- EXTRA siman pasá komo promé media di komunikashon a skirbi tokante un kaso hopi fèrfelu pa algun abitante den bario di Nieuwpoort. For di 30 di novèmber kasnan di algun abitante no tabatin koriente. Esaki tabata pa falta di problema den un transformatòr. Abitantenan a informá EXTRA ku for di djabièrnè 15 di desèmber den oranan di anochi nan a haña koriente bèk. Nan a gradisí EXTRA pa duna atenshon na e situashon hopi fèrfelu, ku segun nan a yuda solushoná e problema.
Dos abitante di Nieuwpoort a splika EXTRA djaluna último ku despues di un korto sirkuito ku a tuma lugá dia 30 di novèmber Aqualectra no a drecha e transformatòr. Esaki pa motibu di un disputa ku Santa Barbara Plantation tokante e kostonan pa e reparashon.
Kasnan den e bario – ku ta riba tereno di Santa Barbara – no ta haña awa via ret; kasnan tin un pòmp pa nan awa. Pa motibu di esaki nan a keda sin koriente i sin awa for di 30 di novèmber.
Aqualectra a splika EXTRA despues di e publikashon ku ta trata di un ret privá di Santa Barbara Plantation unda e abitante(nan) aki ta konektá. E transformatòr ta forma parti di e ret di distribushon interno di Santa Barbara Plantation, segun Aqualectra. E kompania a bisa ku Santa Barbara mester solushoná esaki.
Santa Barbara den un reakshon a bisa ku korto sirkuito tabata den un transformatòr ku tin vários aña den uso i na vários okashon a drecha esaki. A bisa ku e organisashon a hasi esfuerso máksimo huntu ku Aqualectra pa trese solushon duradero pa e problema aki. Segun Santa Barbara nan no a spar niun esfuerso pa yega na un solushon.
Dia 15 di desèmber, mas ku dos siman despues di e korto sirkuito e problema tabata solushoná.
Un di e abitantenan dia 14 di desèmber a komprendé ku Santa Barbara a yega na un akuerdo ku Aqualectra tokante pagamentu di e situashon. Dia 15 di desèmber den oranan di atardi trahadónan di Aqualectra a instalá un transformatòr nobo.
E abitantenan ta hopi felis ku e problema ta solushoná i nan no mester a pasa un wikènt mas sin koriente i awa.

PORTRET
...Transformatòr bieu ku, pa motibu di un korto sirkuito, no a duna koriente na algun abitante di Nieuwpoort pa mas ku dos siman...