...”Kon a bai”....esei ta título di e kansion di Clinton Hato di Hype. Clint, Clinton, CH, asina e ta konosí serka su fanátikonan. Clinton Hato a kuminsá ku kor di misa ku su 5 aña. Den kor di su tanta i despues a sigui pa kornan mas grandi i einan el a graba su promé kansion ku tabata Step by Step pero na papiamentu Stap pa Stap. Di einan Clint a sigui pa Karabelitos i despues Karabela i di einan el a switch i drenta bandanan grandi den farándula na Kòrsou.

Stap pa stap kanando mi ta bai,

sin mi sa ma yega asina leu....esei ta djis un pida di e kansion ku Clint a kanta pa Djasabra ounke e tempu ei, tempu den kor di misa e stèm tabata mucha mucha, asina e mes a bisa.

Henter famia den muzik.....

Di parti tata ta kasi henter su famia ta hasi muzik. Su wela di parti di tata, tabata kanta, tantanan ta kanta, tata ta kanta i “mi mama ta hasi muzik si, pero e ta toka radio”, asina Clint a bisa ku e mesun alegria ku semper e ta demostrá unda ku e bai. El a bisa ku su mama ta e i su ruman su fanátikonan number unu.

Meskos ku kualke otro mucha, Clinton a kana su skolnan normal. For di su kleuter te su MBO. El a kaba Maria College, St. Joseph i Fambo. I despues MBO. Aktualmente e ta trahando na Banco di Caribe.

Di kitara pa kanta....

Pa straño ku ta parse, nunka tabata Clinton su deseo di kanta. E semper kier a toka kitara, pero ta su mama a pidi pa lag’é kanta i awor ta kanta su e ke kanta. Clinton ta toka kitara tambe pero a dediká mas na kantamentu. No tin nada mas dushi pa mira un hende ta felis, dor di su talento, asina el a opservá. I mas ainda ora e mira hende ta gosa riba loke e ta hasiendo, solamente for di su talento.

Mi ke ta un ehèmpel pa otronan....

Ku Karabelitos e ta kòrda di un kansion di Izaline Calister pero na seú. “Ora bo ta kantante bo ta bira outomátikamente un aktor tambe pasobra bo tin di drenta den bachi di e kansion pa e hende ku a biba e situashon por rekonosé su mes pa ku bo riba stage”. Clinton ke ta un ehèmpel pa otronan i mas ku tur kos motivá otronan pasobra “despues di mal tempu, kapitan ta kontentu...”, Clinton a enfatisá, kual ta palabranan di e kansion Kon a Bai.

Pasku Namora i awor Kon A Bai...

Promé ku e kansion Kon A Bai ku ta pega aktualmente, Clinton tabatin Pasku Namora huntu ku Dibo D di Gio. Pero e kansion ei tabata mara na un temporada chikí. Kon A Bai a nase un mardugá ora Clint tabata bèk parker su outo i a haña un melodia. Un melodia ku frase. El a kue su telefòn i grab’é mesora i di einan tur kos a bin aserka. Loke ku tur hende a gusta den e kantika ta “dushi tende, mi ta yu di Karma lo no dura pa bo konosé mi mama” i e kos ei tabata esun di mas fèrfelu pa hinka den e kantika. Meskos ku den pelíkula no ta esnan grasioso so tin pero tambe esnan pa laga bu pensa i p’esei e kansion aki, algu sentimental pero tòg  siña bu algu. Un pareha ku ta kibra i esun ta keda desampará pero e no por keda yora pa semper p’esei loke den e kansion ta bisa, despues di mal tempu kapitan ta kontentu.

Farándula na Kòrsou....awor aki Clint ta kontentu pasobra ku su kansion el a haña un boost. E sa ku situashon ekonómikamente no ta esun mihó pero e no ke ta esun ku ta keda papia ku kos ta malu i kos ta malu. Si bo sinta bisa kos ta malu kos no ta pasa p’esei mester move.

Mi no tin límite....

E no tin límite pa yega den farándula, Mi no ke limitá mi mes nunka, mi ke keda traha duru, ta konsistente i logra lo máksimo. Clinton a sali di Karabela, bai Gio i awor ta forma parti di Hype. Den Gio ta universidat di ritmo kombiná el a yega. Den Hype ta hendenan ku hopi smak pa logra i esei bo mester den bida pa logra.

Clinton ku hopi zjeitu a bisa ku e tin su frei kende ta sostené tur ku tin, i esei ta algu masha great pasobra no ta nada fásil. I pa loke ta e fanátikonan, eseinan ta loko mes i ta un reakshon masha positivo. E fanátikonan ta biba kuné.

            Kon A Bai              

Dushi kon ta bai

tur loke mi ke sa ta kon ta bai
KORO:yu masha ten
e situashon no ta fásil
pero mi no por legumai

KORO:legumai

sinta mi so ku luna
ta desogá i dialogá
bida ta yen di pregunta
ku nos no por kontesta, dikon ba bai?

KORO:surututuuuuh

si nèt awor ku mi a kere
ku nos relashon jah a settle

KORO:awor ku ba bai

kisas bon ke tende
bida ta sigui mundu ta sigui drai

KORO:awor ku ba bai

ma sinti hopi doló tur nos plan nan ba benta afó

KORO:awor ku ba bai ma yora hopi pa bo, dushi tende lágrima ta laba kurason

dushi kon ta bai mi ke bo sa mi ta felis awor sin bo

KORO:Sin bo 2x

Preg:

-kisas bo a pensa ku e barku no lo nabegá sin bo -akaso ba pensa ku bida no lo sigui mas
Ba plama mi laga mi ku miedu awor mi ta kompletu skucha mi un momentu

KORO:kon a bai

-dushi mi ta spera bo ta bon
-te deseo lo mehor de corazon
-ata mi awó ta biba sin bo
-sin bo anto mihó
-ba laga mi ku miedu
-pero awor mi ta kompletu
-despues di mal tempu
-kapitan ta kontentu
-hasi malu haña palu palu
-símbolo di felisidat por tabata nos pero ba dañ’e kos -hasi malu haña palu palu símbolo di felisidat por tbt nos pero ba dañ’e kos

DUSHI TENDE MI TA YU DI KARMA NO LO DURA PABO KONOSE MI MAMA!