Investigashon: Mester oumentá e kantidat i kalidat di personal di Landsrecherche

WILLEMSTAD - Na 2020, Konseho pa Mantenshon di Lei (Konseho) a realisá un investigashon tokante kalidat di maneho, kumplimentu di tarea, kolaborashon i e resultadonan di Landsrecherche Curaçao (LrC). LrC ta un komponente integral di kadena hudisial riba tereno di investigashon di delito relashoná ku integridat. E ta kai bou di responsabilidat di minister di Hustisia, miéntras ku Prokurador General (PG) ta ehersé outoridat riba LrC.

E investigashon ku Konseho a realisá a mustra ku, despues di mas ku 10 aña di eksistensia, ainda e institushon di LrC no ta reglá den lei. Na novèmber di 2020, a entregá konsepto di un ordenansa nashonal di e institushon na minister di hustisia. Unabes esei keda aprobá, lo fiha e desishon di institushon i e Plan di Strukturashon i Formashon.

LrC ta dediká prinsipalmente na investigashon di delito ku ta sospechá funshonario (semi)gubernamental di dje, relashoná ku violashon ku ta (òf ku por) afektá e integridat di e aktuashon di gobièrnu. LrC ta realisá investigashon riba enkargo di PG. Na nivel di ehekushon, LrC ta ser dirigí entre otro mediante konsulta regular. Banda di su gerensia, LrC lo mester konsistí di e departamentonan Tactiek, Bedrijfsvoering i Recherche Informatie & Ondersteuning. Sin embargo, e departamento di Recherche Informatie & Ondersteuning (RIO) no ta operashonal ainda.

Tambe, e investigashon ta indiká ku mester oumentá e kantidat i kalidat di personal di LrC den sentido tantu kuantitativo komo kualitativo. Ademas, LrC no ta disponé di sufisiente rekurso teknológiko pa por hasi sierto tipo di investigashon. LrC ta deseá di por tin su maneho finansiero den su mes man.

Pa loke ta trata kolaborashon, e investigashon a mustra ku, na nivel lokal, LrC ta kolaborá entre otro ku diferente departamento di KPC. Na nivel interregional, LrC a firma protokòl di kolaborashon ku Landsrecherche Aruba i Landsrecherche Sint Maarten. Na nivel di Reino, LrC ta traha ku Rijksrecherche.

Den su plannan di aña, LrC no a inkluí ophetivo tokante e kantidat di kaso ku e lo ke atendé.

Konseho ta di opinion ku e defisiensianan ta stroba LrC di funshoná manera mester ta.

Pa LrC por funshoná na un manera óptimo, ta importante pa ankra organisashon di LrC formalmente, segun e prosedimentu legal preskribí, definiendo asina LrC su struktura i tambe su tarea-, kompetensia- i métodonan.

Ademas, Konseho ta di opinion ku PG lo mester pèrkurá pa e palabrashonnan hasí entre LrC i Ministerio Públiko tokante durashon di e investigashonnan ser dokumentá i kumplí.

Riba tereno di personal, kontratashon di reshèrshi táktiko i di personal pa e departamento RIO tin prioridat na LrC. Tambe mester tuma den servisio reshèrshi riba tereno finansiero i digital, dossiervormer (dokumentadó) i analista.

Fuera di esei, Konseho ta di opinion ku, pa evitá un posibel pèrdida di kapital, mester kumpra e ekiponan despues di a kontratá e personal spesialisá.

Pa loke ta trata kolaborashon ku e partnernan lokal, Konseho ta konsiderá esaki algu ku mester fomentá. Tambe Konseho ta di opinion ku mester fiha sifra indikadó ku por usa pa evaluá prestashon i resultado.