WILLEMSTAD.- Den dianan ku ta sigui aki lo Sali den prensa yamada pa interesadonan pa partisipá na un destaho públiko pa maneho di e sistema di parkermentu den sentro di siudat. Pero miéntras tantu tur hende ku para den siudat awor aki tin di sigui kumpli ku e pago.

E dianan aki tin hopi hende a haña nan di klèm pasobra nan a kere ku no tin di paga pa parker mas. Esaki no ta kuadra i minister Zita Jesus Leito den entrevista ku EXTRA a splika e prosedura ku ta kanando.

Minister Zita Jesus Leito a bisa di ta atendiendo ku e parkermentu den siudat. For di 2010 tin Parking Authority (PAC) ku a haña e maneho aki pa 10 aña.

A surgi un ke otro problema algun dia pasa pero e kontrolnan riba paga pa parker den siudat ta bek i tur hende tin di kumpli ku esaki. Ta un maneho tin pa ku paga pa parker den siudat manera minister Zita Jesus Leito a bisa EXTRA.

E Parkeerbeleid ei tei for di promé ku 2010 i esei ta loke gobièrnu ta sigui ehekutá pero lo bai organis'é mas mihó.

Ta bisa ku ta komo tin di paga pa parker den siudat, kos ta bai malu den Punda i Otrobanda., Minister Jesus Leito no ta kere esei. Loke el a pone énfasis riba dje ta ku promé ku tabatin e maneho ku tin di paga pa parker, ta unda ku ta tur hende ta parker. Riba alsera, dilanti di otro, unda ku tin un pida lugá ta pone e outo.

I p’esei e maneho a bin pa struktura e sistema di parker, dor di hasié paga. E hende por skohe kuantu e ke keda para einan, pero e tin di paga pa e parker den Punda i Otrobanda.

Awor e momentu a yega ku tin di buska un manehadó nobo òf kisas asta esun eksistente, tur kos ta dependé ta ken ta gana e destaho.

E kambio ku lo bin awor ta ku no ta duna un maneho pa 10 aña largu pero 5 aña. pa loke ta trata e pregunta si gobièrnu a logra benefisio ku pago pa e parkermentu paga, minister a bisa ku esei ta kanando aktualmente.

Tin hopi kos ku a hunga un ròl i p’esei mes e sistema nobo pa un maneho di 5 aña lo bai mas organisá i struktura. Minister Zita Jesus Leito ta spera ku lo keda kla ku maneho nobo pa e parkermentu den siudat na luna di aprel. Tur kos ta dependé ken lo bira e operadó nobo. Den dianan ku ta sigui segun sra Zita Jesus Leito lo Sali e aviso kaminda ta anunsiá e destaho públiko pa yega na operadó nobo.