WILLEMSTAD.- Gobièrnu ta informá di destaho públiko ku ta bai tuma lugá pa interesadonan pa organisá karnaval di Bándabou i Seú.

Ministerio di enseñansa, siensia, kultural i deporte e sektor kultura i deporte ta enkargá ku dunamentu di supsidio i supervishon di organisashon di aktividatnan, den kuadro di karnaval na Bándabou i tambe e fiesta di kosecha.

Pa loke ta e karnaval di Bándabou ta spera ku e aktividatnan ta keda desaroyá ku ta pas den kuadro di e meta, e promoshon di formashon di nashon, “sociale cohesie” i desaroyo di identidat pa medio di kultura. Den e kuadro aki a traha riba un programa di eksigensia pa esnan interesá den desaroyo di e aktividatnan di karnaval pa e periodo di 2025 te ku 2027.

Esun interesá por manda un email na secretariaat.uocs@owcs.gov.cw pa asina e por haña di forma digital e programa ku ta disponibel te ku 22 di novèmber 2024. E último fecha pa entrega un oferta ta 6 di desèmber 2024 pa 15.55. E oferta mester keda entregá na e ofisina di organisashon di ehekushon na Bon Bini Business Center.

Un di e eksigensianan ku nos a tuma nota di dje ta un plan di ehekushon di kon ta bai organisá e aktividatnan.

Mesun kos ta konta pa e fiesta di kosecha Seú tambe pa e periodo di 2025 te ku 2027. Pa Seú ta konta meskos esta e programa ta disponibel te 22 di novèmber i mester ta entrega mas tarda 6 di desèmber pa 15.55 di atardi tambe na e ofisina na Bon Bini Business Center.

E destaho públiko ta tuma lugá 9 di desèmber na e ofisina na Bon Bini Business Center pa tur dos aktividat i tur esnan interesá lo haña un invitashon pa tei presente durante di e destaho públiko.

Tur e eksigensianan ku e destaho públiko ta rekerí ta den avisonan ku ta Sali den nos korant.