WILLEMSTAD – Net promé ku dianan di fiesta direktiva di MIL a keda konfrontá ku un situashon sumamente lamentabel. Den un akto ku por keda denominá tòg komo kriminal, un ‘molotov coctail’ a keda tira den un di e lokalnan di duna lès na e skol avansá aki. Por bisa ku e destrukshon tabata basta grandi i akto di vandalismo aki tin su gastunan haltu. Na momentu di a tira e ‘molotov coctail’ esaki a kousa un kandela ku a kima mobilario di e klas i kibra e mosaikonan. Ta na momentu ku e werksternan a bai drenta e klas pa hasi limpiesa ku tuma nota kiko a sosodé. E magnitut di e eksploshon mester tabata basta grandi ya ku asta e fèn, muraya i dak a risibí daño. Polis ta investigando e kaso serio di vandalismo aki i ta spera ku lo por hasi detenshon pronto.