WILLEMSTAD.-Un pakus den sentro di siudat, den kaya grandi di Punda a bira víktima di ladronisia kombiná ku destrukshon formal. Un daño inmenso a kousa na e pakus aki. Ta trata di e pakus Up Town unda ladronnan a kibra glasnan pa asina por drenta i hòrta paña.
Tabata mas o ménos 4’or di mardugá ku polis a haña notifikashon di e kiebro. Un vèn blanku ku blou a kore yega na e sitio i algun tipo a baha afó armá ku mukel grandi nan a kibra e showcase. Nan a bai ku hopi paña di marka. Polis i Securitas tabata na e sitio i a pidi TFO i atrako tim pa presentá na e sitio. E ladronnan a bringa ku un bewaker den Punda i a trata na bai ku su telefòn tambe. E bewaker tabata na un cafe un poko mas i a tuma nota di loke tabata pasando.
Último tempunan mas i mas tin e pensamentu pa hòrta pa bisti paña di marka na lugá di e pensamentu pa bai traha pa por yega na tur loke hende tin deseo di dje.
Den kaya grandi tin kámara di seguridat pues ta di spera ku hopi lihé outoridatnan lo logra pone man riba esnan kulpabel.
