Ta mancha nòmber di Ministerio Públiko tambe

WILLEMSTAD.- Por a tuma nota di bastante reakshon riba ret sosial i komentario den kòmbersashonnan den tur skina na Kòrsou a base di un publikashon di EXTRA riba informashonnan ku ta konosí den seno di parlamento riba e proseso polítiko ku a kana pa eksonerá 3 miar florin na debe di impuesto. Den e komentarionan ta kuestioná alabes e ròl te ainda di Ministerio Públiko den e totalidat.

Den e mensahenan ku ta bai rònt riba entre otro Facebook i WhatsApp, por a tuma nota ku ta bisa di ta disponé di mas detaye riba lokual EXTRA ta skibi. Entre otro ta menshoná nòmber di hende manera nòmber di kolaboradó di minister di Finansa, ámtenar di servisio di impuesto i trahadónan di e fundashon di akountentnan di impuesto, SBAB ku tabata forma parti di komishonnan ku a traha riba un maneho pa limpia registronan di servisio di impuesto. Mas aleu ta menshoná ta ki tipo di komersiante lo a privilegiá personalmente pa un suma di 18 mion florin for di e desishon pa limpia registronan di servisio di impuesto for di 2017 i promé.

Tambe ta duna detaye di kon e proseso di toma di desishon lo a kana ku lo a yega na un situashon ku e minister di Finansa lo a tuma un desishon ku ta otro for di esun ku Konseho di Minister a tuma na promé instante kaminda tin un diskrepansia di 2 miar florin den e suma total ku a disidí ku no ta kobra mas na impuesto ku debe.

Ministerio Públiko

Manera menshoná Ministerio Públiko tampoko ta sali bo for di e komentarionan. Un di e mensahenan ku ta bai rònt ta bisa: “Ministerio Públiko ta bisa ku no tin kapasidat pa hasi tur investigashon. Ta niun hende, kompania òf gobièrnu tin rekurso ilimitá ku por hasi tur kos. Ta kestion di pone prioridat. Ministerio Públiko ta investigá yen delito di impuesto, pero pa investigá e mama di tur delito di impuesto no tin kapasidat. Ku esaki Ministerio Públiko ta pèrdè tur kredibilidat. Pa kolmo ta un krímen kaminda tur detaye ta riba kaya i tur prueba ta den nan kara.”

Prokurador General, Guillano Schoop tampoko ta sali bon for di e krítikanan. Schoop ku a asumí e funshon e aña aki ta haña kritiká pasobra den pasado el a duna kurso na e instituto di enseñansa “ABC Opleidingen” ku segun komentarionan ta ligá ku minister di Finansa. Den un mensahe ku portrèt di Schoop ku ta bai rònt ta pidi e Prokurador General pa e entregá su retiro i  duna kurso serka su ‘amigu’ pasobra e lo ta inkapas pa práktika hustisia hustu.

Minister di Finansa, Javier Silvania dia 24 di sèptèmber awor ta bèk den parlamento pa un biaha mas respondé preguntanan di parlamento riba su desishon pa na komienso di 2023 duna eksonerashon di debe di impuesto na rason di 3 miar florin. Tabata frakshonnan di MAN i PAR ku a pidi e reunion ku karakter di urgensia.

Un reunion di Komishon Sentral riba e tópiko aki ku a kuminsá na mart 2023 a kontinuá te 19 ougùstùs 2024 kaminda Silvania a kontestá preguntanan ku a hasi su persona 1 aña i 5 luna promé. Parlamento no a keda satisfecho ku e kontestanan risibí. Frakshon di MAN entretantu a pidi minister pa manda tur dokumento relevante manera konsehonan di diferente departamento riba e desishon pa duna eksonerashon pa parlamento promé ku reunion di 24 sèptèmber kuminsá.

Manera EXTRA a informá tin preguntanan klave ku e parlamentarionan ke haña kontesta riba dje ta: si den e desishon pa duna eksonerashon di tur debe di impuesto di 2017 i promé tabatin intervenshon pa yuda un komersiante spesífiko ku tabata debe 18 mion florin na impuesto. Tambe ke sa si a neglishá e kondishonnan ku Konseho di Minister a mara na su desishon di 24 ougùstùs 2022 pa no kobra sierto debe di impuesto mas i si minister di Finansa a duna un instrukshon ku ta surpasá su outoridat. Alabes tin interogatorio si a kometé falsifikashon di dokumento den e proseso pa toma di desishon.

Pregunta ku frakshonnan tin mas aleu, ta a base di kua number di dokumento a tuma e desishon pa no kobra mas ku 3,1 miar florin na impuesto.

Foto:

...Javier Silvania dia 24 sèptèmber bèk den parlamento pa defendé su maneho...