JCI ta bai traha plenchi pe muchanan

WILLEMSTAD.-Nos a habri un siman aktivo di forma positivo. EXTRA a tuma nota ku prezunan ta limpiando Advent School den Koraal Specht. Skol ta habri dentro di poko, pues sigur ta krea un dushi ambiente pa e muchanan ku ta bai skol.

Ta resultá ku e organisashon JCI Willemstad ta esun ku a adoptá e skol aki, asina Ryan Quinland a duna di konosé. Tur aña nan ta adoptá un skol i den e aña ei ta pèrkurá pa mehora e ambiente na e skol pa e muchanan por bai skol ku mas smak.

El a indiká tambe ku JCI ta bai traha un plenchi di hunga pa e muchanan di e skol i den e kuadro ei a pidi i a haña yudansa di prezunan. Una bes ku e área ta limpi nan lo bai traha e plenchi di hunga.