WILLEMSTAD .- Un grupo di venezolano detené aktualmente den prizòn a kousa destrukshon na e sèlnan. Nan a kima entre otro kolchon i kibra partinan di e sèl.
Gobièrnu ta informá ku diariamente Gobièrnu di Kòrsou ta traha riba e efektonan ku e situashon na Venezuela tin riba nos pais. Outoridatnan polisial ta traha riba un proyekto di alehamentu di 63 hende di nashonalidat venezolano, ku ta detené den Sentro Di Detenshon Kòrsou (SDDK). Ta trata di hende sin pèrmit di estadia legal ku, segun tratadonan internashonal i leinan lokal, por bai nan pais bèk sin peliger pa nan bida. Ainda ta sobra 10 hende ku nashonalidat venezolano den SDDK di kua e investigashon di nan situashon no a finalisá ainda.
E nesesidat pa manda e grupo di 63 bai a bira mas agudo pa motibu ku e detenidonan venezolano ayera mainta a kibra diferente sèl i a asta kima kolchon. Konsekuensia di esaki ta ku awor tin asta ménos espasio pa sera estranhero indokumentá. Baraknan nobo ku mester duna mas espasio no ta kla ainda. No tin fondo nesesario tampoko ainda pa traha riba un sentro di akohida mas adekuá pa hende indokumentá. No ta e promé biaha tampoko ku e grupo di detenido ta destruí pertenensianan i infrastruktura di SDDK. Esaki ta trese gastu inesperá kuné.