WILLEMSTAD - Kontinuando ku investigashon relashoná ku un kaso di asesinato, ku a tuma lugá dia 11 di òktober último, polis a detené un sospechoso.

Djamars 13 di òktober 2020, alrededor di 17.55 or, e tim ku ta investigá kasonan homisidio a detené e hòmber sospechoso M.B.A., nasé na Jamaica di 38 aña di edat.

Detenshon a tuma lugá na Warda di Reshèrshi.

Tabata djadumingu alrededor di kuartu pa kuater, Sentral di Polis a risibí informashon di un kaso di hinkamentu serio ku a tuma lugá na un kas den Kura Piedra. Na yegada di e unidat, nan a bin topa un hòmber drumi parsialmente den un krenwá i no tabata duna señal di bida.

Ambulans ku a yega na e sitio, no por a hasi nada mas pa e víktima. Dòkter di polis ku tambe a presentá, a konstatá morto di e hòmber Sheriff Ballentine, nase na Jamaica dia promé di òktober 1978.

For di investigashon preliminar ku polis a logra kompilá na e sitio a sali na kla ku un hòmber a yega na e kas aki unda e víktima tabata biba ku un dama. Despues di un pleitu i bringamentu entre e agresor i e víktima, e agresor a hinka e víktima ku un opheto skèrpi na vários parti ariba di su kurpa. A konsekuensia di esaki, e víktima a fayesé na e sitio. Tabatin rumor ta kore ku for di den oranan trempan di dia ya kaba tabatin problema na e adrès aki, sinembargo polis no por a konfirmá e informashon aki.

A presentá e sospechoso dilanti un fiskal ouksiliar ku a ordená su enkarselamentu pendiente di mas investigashon.