DEN HAAG.-Informashon ku EXTRA ta dispone di ta indiká ku outoridatnan a detené sinku hòmber i un hende muhé den un kaso di labamentu di plaka, loteria i pa partisipashon na un organisashon kriminal. E hòmbernan ku a keda detené tin 66, 56, 52 i dos di 51 aña miéntras ku e hende muhé tin 45 aña di edat. A konfiská obranan di arte, kasnan, kuentanan di banko, vários outo i boto i partisipashon den empresanan na un balor total di 100 mion euro.

FIOD ku ta e sekshon investigativo di servisio di belasting ulandes huntu ku Ministerio Publiko a tene entrada hudisial den dos kas i tambe un edifisio komersial na Ulanda. Tambe nan a tene entradanan hudisial na Bèlgika, Luxemburg, Suisa, Malta, Kòrsou , Suesia i Austria.

Ta sospecha e personanan detené di tabata ofresé wega di plaka(kasino) online riba merkado ulandes i ku nan lo a gana alrededor di 250 mion euro i ku nan a laba esaki. Leinan ulandes ta prohibí pa ofresé wega di kasino online, pero e grupo lo tabata hasi uso di un struktura internashonal pa asina gobièrnu ulandes no por a detektá loke nan tabata hasi.

EXTRA a chek ku Ministerio Publiko di Kòrsou pero a hana di tende ku OM na Kòrsou no ta duna komentario komo ku no ta trata di un kaso di Kòrsou.