WILLEMSTAD.-Ministerio Públiko a konfirmá ku outoridatnan a detené e polítiko di St. Maarten Theo Heyliger. A detené Heyliger relashoná ku akusashon di soborno i korupshon banda di otro akusashonnan. Bosero di Ministerio Públiko Roderick Gouverneur a konfirmá e informashon aki pa EXTRA. OM ta indiká ku mas lat durante di dia lo duna mas detaye di e kaso aki.

Informashon ku EXTRA a logra kompilá ta indiká ku a detené Heyliger den e kaso ku a haña e nòmber Larimar. Ta trata di un kaso den kua ya kaba a detené vários persona prominente na St.Maarten pa korupshon i soborno. Pa basta tempu kaba tabatin informashon ku lo ta investigando e nietu di ‘the Old Man” Claude Wathey. Claude Wathey q.e.p.d. tabata e gran polítiko di St.Maarten ku a hasi hopi pa e isla, pero sinta bou di un palu den siudat di e isla i hamas tabata bai sinta den ofisina. Theo ta nietu pues di Claude. Algun tempu pasa medionan di komunikashon rònt reino a dediká atenshon na momentu ku e lider di partido MFK Gerrit Schotte tabata bai St.Maarten pa kore kampana i partisipá den aktividatnan grandi huntu ku Heyliger. Manera ta konosí Schotte ta sintando su kastigu despues ku tres korte a hañ’e kulpabel pa soborno entre otro akusashonnan.