WILLEMSTAD - Relashoná ku un video ku tabata sirkulá den luna di yüli unda un hóben sintá den outo ta saka un arma i lòs dos tiru, mandando un mensahe ku den Koraalspecht nan ta basha bala, polis a hasi awe dia 9 di ougùstùs 2021 detenshon di e hóben aki.
Detenshon di e hòmber sospechoso G.M. di 22 aña di edat nase na Kòrsou a tuma lugá den Kaya Lando na unda a tene un entrada hudisial tambe.
Despues di presentá e sospechoso dilanti di un fiskal ouksiliar i interogashon, a laga e hóben den libertat.
Tantu polis komo Ministerio Publiko ta informá, ku e kasonan aki ta keda debidamente investigá i un apelashon ta bai spesialmente na hóbennan, pa pensa bon promé ku kometé e aktonan aki.
E por tin konsekuensia hopi serio pa bo despues, ya ku ta keda konsiderá ku bo a bin den kontakto ku hustisia, na momentu ku bo wòrdu detené.