PHILIPSBURG.- Detenshon a kai pa un polis di inisial J.L.V.G (42), miembro di staf di gabinete di e Promé Minister di Sint Maarten. Esaki ta parti di e investigashon WHALE.  Ministerio públiko di St. Maarten ta informá ku ta trata di un investigashon ku RST ku asistensia di kuerpo polisial di St.Maarten i duana bou di supervishon di fiskalnan di ofisina di Prokurador General. Den kuadro di e investigashon a realisá un entrada hudisial awe mainta na un kas na Cole Bay.

Ta sospecha J.L.V.G di a tuma soborno, falsifikashon di dokumentu i tambe violashon di konfidensialidat. E sospechoso J.L.V.G ta keda den aresto, miéntras ku mas detenshon por kai, asina Ministerio públiko di St. Maarten ta duna di konosé.