WILLEMSTAD.-Un ratu pasá e fotógrafo di prensa Umpi Welvaart a keda presentá un bia mas dilanti wes komisario ku a prolongá su detenshon ku 60 dia mas. Manera ta konosí den e mardugá di 22 pa 23 di ougùstùs último a konfiská su boto yamá ‘El Capo’ unda outoridatnan a haña piská, kiwa, oro i droga. Bosero di Ministerio Publiko a kaba di konfirma esei pa EXTRA

Riba e dia enkuestion a detené dos hòmber riba e boto ‘El Capo’. Umpi Welvaart, fotógrafo di prensa di e korant Vigilante a atmití ku ta su boto pero ku el a fia e boto na su amigu i su tio. Dia 10 di sèptèmber último a detené Welvaart. Entretantu a prolongá su detenshon na tres okashon kaba ku 8 dia. Un ratu pasá EXTRA a haña e konfirmashon ku awor a prolongá e detenshon di e fotógrafo di prensa ku 60 dia mas. Manera indiká anteriormente, e kaso a kue un otro buèlta na momentu ku a topa ku oro tambe na bordo.

EXTRA a haña e konfirmashon tambe ku a trasladá e detenido di sèlnan na Barber pa prison na Koraal Specht i tanten outoridatnan ta sigui ku e investigashon den e kaso aki.