WILLEMSTAD.- Un notisia ku a plama riba retnan sosial a sòru pa basta konmoshon i preokupashon. Pa kolmo ta notisia kompletamente robes. E informashon ta ku ayera nochi outoridatnan a detené un hòmber di fam A. riba sospecho di trafikashon di hende.

E hòmber di fam A. ta un funshonario di landsrecherche. Outoridatnan a detené na un establesimentu riba Caracasbaaiweg. E hòmber aki ta kasá ku un dama ekstranhero.

Ministerio públiko a saka nan informe ofisial:Djaweps anochi a detené un kabayero i un dama riba sospecho di entre otro trafikashon di hende den forma di ekstorshon laboral, kontrabanda di hende i dunamentu di trabou di forma ilegal. Banda di esaki a tuma lugá diferente entrada hudisial. Ta sospechá e personanan enkuestion basá riba un denunsia I algun deklarashon di testigunan. E sospechoso maskulino ta un reshèrshi di Landsrecherche Curaçao. E rumornan ku lo ta trata di un funshonario di Wardakosta ta kompletamente inkorekto. Pa por salbaguardiá e independensia di e investigashon, Landsrecherche di Sint Maarten lo tuma over e mando riba e investigashon, mientras ku e tim investigativo multidisiplinario ku a keda establesé na Kòrsou lo sigui ehekutá e investigashon. Por lo pronto no tin sospecho di mal uso di outoridat; e tim di investigashon ta sospechá ku e hòmber a kometé e echonan pafó di su oranan di trabou na Landsrecherche. Na bienestar di e investigashon ku lo sigui den e dianan ku ta bini, no por duna mas detaye riba e kaso aki.