WILLEMSTAD.- Ayera 28 di aprel, personal di Divishon di Krímen Organisá di polis ofisialmente a detené tres latino pa 217 kilo di mariwana ku nan a trese tera na Playa di Sta. Cruz dia 24 di mart último.
Riba dicho dia den oranan di mainta e Sentro di Reskate i Kordinashon (RCC) di Wardakosta a detektá un boto ku tabata nabegando direkshon di Kòrsou. Mesora RCC a dirigí e patruya di Jaguar ku tabata riba laman na e lokalidat di e boto sospechoso.
Tambe a pidi Kuerpo Polisial di Kòrsou nan asistensia pa motibu ku e boto tabata nabegando hopi serka di kosta. Na yegada na e sitio polis a enkontrá kuater pakete i un tas den mondi.
Riba laman e cutter Jaguar a detené e boto tipo yola ku tres hende hòmber na bordo ku tabata nabegando direkshon di sùit.
E tres hòmbernan, di kual dos kolombiano i un venezolano a ser entregá na polis pa sigui ku mas investigashon.
Ayera djárason 28 di aprel 2021 e personal di Divishon di Krímen Organisá di polis a notifiká ku ofisialmente a detené e tres tripulantenan di e lancha ku Warda Kosta a interseptá riba e dia ariba menshoná.
Ta trata di e hòmbernan sospechoso: W.A.G.R. nasé na Venezuela di 36 aña di edat; L.M.P.L. nasé na Colombia di 58 aña di edat i C.E. nasé na Colombia di 19 aña di edat.
A presentá e trio dilanti un fiskal ouksiliar ku a ordená nan enkarselamentu pendiente di mas investigashon.