WILLEMSTAD.- Kuerpo polisial ta informá ku djamars 30 di òktober, den kareda di 6’or atardi, e personal di Mantenshon di Órden Públiko, riba òrdu di Ministerio Públiko, a detené un hende hòmber. A detené e hòmber J.F.D nase na Kòrsou di 38 aña di edat pa su posibel partisipashon den un kaso di ladronisia ku violensia den kua morto a kai. Esaki di atrako ku morto aki a tuma lugá dia 5 di òktober 2017.

Polis ta informá ku e detenshon a tuma lugá na altura di un minimarket den e área di Roi Santu. A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.

Investigashon ku EXTRA a bai hasi relashoná ku e informashon ku polis a suministrá ta mustra ku riba e dia 5 di òktober  a tuma lugá e kaso di atrako ku violensia ku a kaba den asesinato di un komersiante chines na Chi Chi Minimarket na Roi Santu. Outoridatnan a hasi investigashon pa por saka afó kiko eksaktamente a pasa ku a kosta bida di tantu e víktima komo un di e tres atrakadornan den e kaso enkuestion. A publiká imágennan kaptá pa kámara di seguridat  i den e imágennan por a tuma nota kon e outo di famia a drenta paden miéntras ku e tres atrakadornan a pusha e porta habri bèk i a bai riba kasa di e víktima pushando esaki den muraya. Djis despues por mira na momentu ku e hòmber víktima a keda tira/asesiná. Den e imágennan por mira tambe un di e atrakadornan ku un tas riba su lomba. Esaki ta e atrakador ku a bin pèrdè su bida den e mesun kaso aki. Pues e dos otro sospechosonan a logra hui for di e sitio.  Mas detaye den edishon di EXTRA mayan.