WILLEMSTAD.- Polis den nan informe ofisial ta indiká ku den kuadro di e investigashon relashoná ku e kaso di asesinato ku a tuma lugá den área di Baya Beach riba djamars 29 di yanüari último, awe djaweps 31 di yanüari 2019, alrededor di 20 pasá di 12 anochi, a detené e hòmber G.M.A.M., nasé na Kòrsou di 52 aña di edat, komo sospechoso den e kaso aki. Riba òrdu di Ministerio Públiko, reshèrshinan huntu ku Tim di Aresto a detené e hòmber aki na un hotèl riba F.D. Rooseveltweg. Alabes a konfiská vehíkulo di e sospechoso pa mas investigashon. A presentá e sospechoso dilanti un Fiskal Ouksiliar ku a ordená su enkarselamentu pendiente di mas investigashon.

Outoridatnan polisial a hasi un detenshon den e kaso di e hòmber di edat ku a haña morto den e área di Baya Beach djamars 29 di yanüari último. Bosero polisial Imro Zwerwer a konfirmá ku den oranan di mardugá polisnan a logra hasi un detenshon.

Djamars mainta hendenan ku tabata den área di Baya Beach a mira un hende benta den un buraku den e área i a mèldu polis. E promé patruya ku a yega na e sitio a topa ku un hòmber ku tabata mustra señal di maltrato severo. Manera EXTRA a informá anteriormente, e parti remarkabel tabata ku a haña e hòmber ku su pénis den su man, ku a kòrta e parti delikado i pone den su man posiblemente. Mas detaye den edishon di EXTRA.