WILLEMSTAD.- E duo ku siman pasá a keda detené pa e robo di 600 kilo di kokaina, ku a tuma lugá

na òktober di aña 2018, ta keda será.

Esaki despues ku nan a keda presentá dilanti hues komisario ku a prolongá nan detenshon.

E kaso a haña e nòmber Inex 2.0.

Riba e fecha ariba menshoná, komunidat di Kòrsou a keda di shòk ku e notisia ku den warda di reshèrshi, tabatin robo di 600 kilo ku reshèrshinan a konfiská i tabata pendiente pa bai keda destruí.

E informashon ku tabatin dje robo na òktober 2018 ta ku e  malechornan a logra fòrsa dos porta di heru basta pisá hasiendo uso di “Slijptol”.

Di e forma aki e malechornan a yega den e bodega, kaminda tabatin basta kos ku polis a konfiská entre otro un kantidat  kuantioso di kokaina, ku tabata wardá. E ladronisia lo a sosodé den oranan di mardugá nèt na momentu ku tabatin yobidanan fuerte i inundashon na diferente sitio, pues nèt na momentu ku polisnan tabata man yen riba kaya.

Den investigashon aki, dia 14 di òktober den oranan di mainta tempran, outoridatnan a konfiská un vèn ku a ser hañá kimá riba Weg naar Bullenbaai. E vèn aki posiblemente a keda usá pa e robo.

Siman pasá a detené tres hòmber pero 1 a keda lagá den libertat.

Ta trata di tres hende hòmber entre 25 pa 60 aña. Nan ta wòrdu sospechá di trafikashon di droga.

Aparentemente nan tabata enkargá ku benta di e droganan.

E hòmbernan ta será ku restrikshon.