WILLEMSTAD. - Ayera anochi 8or pasá Servisio Meteorológiko Kòrsou a saka nan di 12 boletin spesial di kódigo hel pa laman brutu. E mensahe pa laman brutu ta pa áreanan di Kosta nort di Kòrsou.

Segun Meteo, análisis di pronóstiko ta indiká desaroyo di kondishonnan di laman brutu ku por menasá partinan di kosta di Kòrsou.

P’esei e medida di prekoushon ta drenta na vigor. Ta konsehá usuario di boto chikí pa tene kuidou ora ku nabegá den e kondishonnan aki.

Debí ku inundashon ta probabel den sierto área kantu di kosta, ta urgi    doño di fasilidatnan na kosta pa protehá nan propiedat, kaminda ku esaki ta     posibel. Ta konsehá hende ku ta landa pa tene kuidou i no bai leu for di kantu.

Bientunan por lo general moderá ta sigui prevalesé, miéntras laman basta brutu ta persistí serka di kosta na e parti nort di e isla. Pa e motibu akí, un alerta (Kódigo Hel) pa laman brutu ta keda na vigor pa e área spesífiko aki. Kondishon di laman ta moderá te lokalmente basta brutu ku altura di ola entre 1.5 i 2.5 meter (entre 4 i 8 pia). E olanan di mas haltu lo ta riba laman habrí, pegá ku kosta na nort.

Pa loke ta trata tempu, shelu ta parsialmente te tiki nublá. Ta premirá un kondishon di tempu relativamente mas seku despues den mardugá i mayan den dia.

Temperatura máksimo lo alkansá 30ºC i temperatura mínimo 26ºC. Bientu ta generalmente ost i moderá te basta fuerte; forsa 3 te 5 (12 te 39 km/ora, 7 te 21 nudo). Ráfaga, de bes en kuando fuerte; forsa 6 (40 te 50 km/ora, 22 te 27 nudo).

Situashon general, ta indiká un tiki humedat ta persistí den un koriente di airu for di ost i esaki por kousa algu di áwaseru riba partinan di e isla. Mas lat, kondishonnan atmosfériko generalmente stabilisá lo goberná den e área di nos isla i kondusí asina na wer mas seku durante restu di e periodo di pronóstiko.

Perspektiva te djárason atardi, ta bientu, un poko mas fuerte ku wer generalmente seku.