WILLEMSTAD - Kontinuando ku un investigashon relashoná ku malversashon c.q. ladronisia na boka di trabou, falsifikashon di dokumento i labamentu di plaka, polis a hasi un detenshon.

Djárason 26 di mei 2021, alrededor di 09.26’or, reshèrshi di VVC, a detené e dama N.L.D.W. nasé na Kòrsou di 36 aña di edat, pa komplisidat den e kaso ariba menshoná.  Detenshon a tuma lugá na Warda di Reshèrshi na Garipitoweg.  A presentá e sospechoso dilanti un fiskal ouksiliar ku a ordená su enkarselamentu pendiente di mas investigashon.

Anteriormente dia 20 di mei 2021, alrededor di 10.30 or, reshèrshi di VVC, tim enkargá ku investigashonnan di froude, personal di UST bou di supervishon di Hues Komisario i Fiskal di Ministerio Públiko, a tene entrada hudisial na un adrès na Kaya Cederela. Na e sitio a detené e hòmber sospechoso M.J.C. nasé na Kòrsou di 45 aña di edat pa e echonan ariba menshoná.

Djaluna 17 di mei polis a detené un dama relashoná ku e kaso aki. Ta trata di S.C.P. nasé na Kòrsou di 28 aña di edat.  E detenshon a tuma lugá alrededor di 14.05 or na warda di Reshèrshi.  A presentá e sospechosonan dilanti un fiskal ouksiliar ku a ordená nan enkarselamentu pendiente di mas investigashon.