WILLEMSTAD.- Inspekshon di Ekonómiko, KPC/Wijkteam Punda, Duana, GMN/THZ, SBAB i SVB riba djasabra 21 òktober 2023. Ta masha remarkabel i tristu pa menshoná ku di 9 establesimentu kontrolá, 6 a keda será. Esaki ta nifiká ku e mensahe ku ta bai pa e sektor aki no ta keda komprondé ainda, òf ta kere ku por burla di nos outoridatnan.

E kontròl a ser realisá den área di: Ruyterkade, Plasa Mundu Merced, Castorweg, Brievengat, Caracasbaaiweg. A kontrolá total 9 lokalidat.  8 di Horeca i 1 Supermarket. Di e kantidat aki a sera 6, dos tabata na òrdu i un a haña atvertensia.

A bai kontrolá na Waaigat Bar Restaurant na Plaza Mundu Merced 2. E situashon na e establesimentu aki tabata di tal forma i a-higiéniko ku mester a ser’é.

A kontrolá Baresto Kome Bon na De Ruyterkade38. Den e kaso aki ta diferente fayo e tim a topa kuné. Nan ta; Pèrmit di Duana no ta na òrdu, Inkumplimentu ku SBAB, No tin karchi di kùr, vestuario no apropiá, uña  falsu, prenda i esaki a pone ku mester a sera e establesimentu.

Mas aleu a bai  Sun Sing Restaurant na De Ruyterkade 42. E situashon aki tabata a-higiéniko i mester a ser’é inmediatamente.

E tim a bai Yuen Tung Restaurant na Castorweg 19. Meskos den e kaso aki esta situashon di e establesimentu tabata a-higiéniko i mester a ser’é.

A bishitá Nanjuan Restaurant na Winkel Center Brievengat Kava H-6. Otro establesimentu ku un situashon a-higiéniko i mester a sera esaki tambe.

Cafetaria Bon Bini na Jongbloedweg 21 tambe a haña un bishita di e tim kaminda tambe a topa ku un situashon a-higiéniko i mester a ser’é.

Den e kaso aki ayera tabatin un informashon ta bai rònt ku a haña pushi den frizer di e establesimentu aki. EXTRA a komprondé ku esaki no ta kuadra ètòl ku bèrdat.

E dosnan ku si tabata kumpli ta Shun Fu Bar Restaurant  na Andres Belloweg 75 A  i tambe Dai Xin Restaurant na Caracasbaaiweg.

Esun ku a haña atvertensia ta New Plaza Supermarket na De Ruyterkade 41/41. Den e kaso aki e atvertensia tabata di duana pa sigaria ilegal ku tabata bende den e establesimentu aki.

Teniendo na kuenta kuantu fayo tabatin den e wikènt tras di lomba, EXTRA a komprondé ku e tim lo intensifiká su kontròlnan den dianan benidero.