WILLEMSTAD.- Apesar ku e kasonan ta mustra un bahada último dianan, epidemiólogo dr. Izzy Gerstenbluth a bisa ku ainda ta muchu tempran pa por kanta gloria. E situashon di alrededor di 150 pa 250 kaso di kontagio nobo pa dia, lo kontinuá asina.
E kantidat di kasonan i morto tabata abou te promé ku elekshon. Tabatin 22 morto. Despues di elekshon kasonan di kontagio a subi barbaramente i meskos ku kasonan di morto. Dr. Gerstenbluth a bisa ku den 3 siman di tempu, kasonan di morto a yega 80. P’esei e kantidat di riba 100 pa 200 kaso pa dia ta keda haltu pa nos isla, e ta di mas. No mester lubidá ku te ku djárason tabatin alrededor di 100 hende interná i 42 hende den Kuido Intensivo kual ta un sifra hopi haltu pa nos, i banda di esaki e kantidat di 9 hende den IC na Aruba. P’esei no por relahá e medidanan debí ku esaki ta otro variante dje vírus for di esun promé ku nos pais tabata dil kuné.
Si laga lòs lo mira un subida atrobe di kasonan di kontagio nobo.
No por relahá dor ku e situashon no ta bon kontrolá.
Tambe por mira ku e vírus ta aktivo mas tantu den e grupo di 40 pa 60 aña i tambe hende mas yòn di 20+ i 30_ a fayesé a konsekuensia dje vírus.
Mas aleu dr. Gerstenbluth a bisa ku si e no logra e kantidat di hende pa vakuná esta 85% di poblashon, chèns ku nos por haña un plamamentu dje vírus i atrobe mester bai den “lockdown”. Aki no tin kuestion di esnan ku a vakuná òf no vakuná. Pero si e epidemiólogo a enfatisá ku e kantidat di hende vakuná no ta determiná e relahamentu di medidanan.
Dr. Gerstenbluth tabata fuerte kontra e diskushon tokante di vakuna, i a pidi tur hende pa sigui informashonnan verídiko. Ademas el a desaprobá aktitut di doñonan di trabou ku ainda ta eksigí di trahadónan pa pasa tèst pa mustra ku nan ta negativo despues di a haña COVID. Asta lo tin negoshi ku ta hasi nan propio tèst, kual no ta korekto. Pasó no sa ku nan ta hasi e tèst korektamente i informashon dje tèst no ta yega serka GGD i kisas e por influensiá e kantidat di kasonan di kontagio tambe.
Dr. Gerstenbluth a pidi pa doñonan di negoshi stòp ku e práktika aki, kual no ta korekto. El a pidi nan pa no tuma e ròl di GGD òf esun di médiko pasobra nan no ta.
Te na e momentu aki ta e variante di COVID-19 britániko nos isla ta konfrontá kuné, segun tèstnan hasí te na e momentunan aki.
Te na e momentunan aki esnan ku a fayesé ta hende grandi, pero tambe e faktor di rísiko di ta obeso tambe a hunga faktor serka algun hende ku a fayesé a base di COVID-19, dr. Gerstenbluth a splika.