...Minister Steven Croes den kombersashon ku sra. Lysandra Trinidad di korant EXTRA...

WILLEMSTAD.- Minister Steven Croes tin un periodo masha kòrtiku den gabinete Rhuggenaath. El a huramentá na novèmber 2021 komo minister di Enseñansa Siensia, Kultura i Deporte. Pues el a okupá e funshon aki pa 6 luna.
Sr. Croes den deklarashon pa EXTRA a duna di konosé ku el a bini for di sektor priva kual ta full otro for di trabou di un minister i polítika. Pero e ta kontentu ku el a tuma e reto aki, i ta un trabou ku ta kambia bida di hende. E ta hopi kontentu ku el a bai e reto.
Apesar di e periodo korto, sr. Croes a bisa di a hasi hopi kos, el a pusha hopi duru pa logra hasi hopi kos importante den su ministerio.
“Semper mi ta bisa ku Enseñansa, Kultura i Deporte ta e base pa forma hende. Kultura ku deporte ta mesun importante ku enseñansa. P’esei el a pusha duru pa nan tres. E ta satisfecho ku loke el a logra den 6 luna.
“Mare mi por a sigui. Mi a kuminsá hopi bon i kier a sigui trèk e liña aki, pero asina e situashon ta”.
Mas aleu minister Croes a bisa ku na momentu el a tuma e funshon algu importante pa ser hasí ta e “nul meeting” pa ku enseñansa. Si ke drecha algu, promé tin di hasi un investigashon profundo pa sa kiko e problema ta, i pa sa ki direkshon ta bai i kiko tin di drecha.
“Awendia tin hopi gritu ku ta bisa “drecha enseñansa, drecha enseñansa, pero nan no sa kiko presis”. Pues e “nul meeting” tabata importante ku a kuminsá kuné. I tambe drecha skolnan, edifisionan di skol ku mester a drecha, i digitalisashon.
Pafó di skol tur kos ta digitalisá i ora muchanan ta den skol esei no ta e kaso. E minister a deklará ku ta e tres liñanan aki, el a focus riba dje pa e periodo korto, i pa nan start. Tambe e ke tabata sigur ku e proyektonan ku el a start, lo sigui despues di su periodo. Pues e próksimo minister di enseñansa tin di sigui ku e proyektonan aki.
Deporte tambe e tabata ke pa mas tantu fasilidat keda krea den barionan. El a pusha duru pa hendenan ku kier a invertí den deporte, por a haña nan kontratonan pa por a kuminsá manehá vèltnan na Kòrsou.