WILLEMSTAD.- Awor ku tin konosementu dje vírus di COVID-9 i su variantenan, por krea perspektiva pa por keda habrí di forma duradero i no mester bai eskalá pa yega na “lockdown”, ta loke ku promé minister demishonario sr. Eugene Rhuggenaath a duna di konosé.

Sr. Rhuggenaath a bisa ku na mart 2020 ku tin e promé kaso, mesora a tuma medida pa salba bida di hende. A sigui investigashonnan i a bin ku métodonan kon pa atendé ku e menasa di e vírus invisibel, pero kon pa mitigá otro riesgonan riba área sosial i ekonómiko.

Tabata eksitoso aña pasá ora a trata di dominá e vírus, pero manera a mira último luna, a konfrontá ku variantenan diferente, e asina yamá variantenan di preokupashon ku a pone ku mester a aktua muchu mas rápido ku medidanan severo ku a paralisá sierto aktividat. Pero a a hasié diferente, dor di bin ku semi-lockdown i no a para ekonomia mesora dor ku sa e konsekuensia. Pasobra lo tabatin sierto empresa ku lo no a soportá un ‘lockdown’. E maneho ta dirigí riba riesgonan mas grandi, aglomerashon di hende kaminda por haña posibel brote grandi pa loke ta trata kontagio.

Ta papia riba medida, pero mester wak e kapasidat di kuido di salú, i di hospital. Banda di tuma medidanan pa evitá kontagio, a pèrkurá pa eskalá e kuido intensivo, a buska mas profeshonal médiko djafó, a amplia kapasidat pa por tèst, hende pa  chèk kontakto di hendenan, isolashon, a amplia kapasidat den tur área. Den último luna  a alsa e programa di vakunashon i sigur e último ola e tabata determinante pa por dominá e vírus.

For di aña pasá despues di a tuma medida di ‘lockdown’ a traha un aserkamentu i un programa kual pa stap pa stap ta habri ekonomia. Tambe a bin ku medidanan di sosten, e ayudo sosial, alivio fiskal pa duna empresanan alivio, a papia ku banko pa bin ku suavisashon pa kliente, NOW-regeling, TVL pa yuda duna aporte pa gastu fiho di empresanan. Tabatin sosten pa empresarionan,  pero di parti MEO a bin fondo pa duna krédito na empresa chikí ku tin mester, sosten i “coaching”. Pasobra tabatin kompania ku mester a restrukturá, pero tabatin hende ku a pèrdè trabou, pero por lanta negoshi nobo.

Den e último fase ku ta den aki, mirando ku mas di 50% a vakuná, tin mas konosementu dje vírus, a tene e asamblea, i p’esei ta bai wak kon pa krea perspektiva pa tuma medida bai eskalá i bai ‘lockdown’, pero pa habri di forma mas duradero, sr. Rhuggenaath a duna di konosé.