WILLEMSTAD.- Hopi biaha ta mira ku e ministerio di MEO ta hasi mantenshon di órden pa ku kontròl di karni, pero ta GMN  tin e ekspertisio. Relashoná ku esaki, minister di salubridat sra. Dorothy Pietersz-Janga a duna di konosé ku MEO no tin e outoridat pa kontrolá karni. Asuntunan veterinario di GMN ta hasi kontròl di establesimentunan ku tin pèrmit di bende karni. MEO ta na altura di esaki.

Di aña 2017 pa 2022, e total di karni tumá den beslag den e periodo ei ta 106.879 kilo. Minister a splika ku e karni por ta konfiská dor ku e no ta apto pa konsumo, esaki no nesesariamente ta nifiká ku e karni ta dañá.

Pa lei por but te ku 200 florin ora tin infrakshon konstatá den kaso di karni kaduká.

Durante kada kontròl di karni ta fiha lokual ta konstatá, palabrá i tumá den beslag pa duna e persona òf e empresa un relato na final di kontròl. E prosèsverbal ta na disposishon di e persona òf empresa dos dia despues dje kontròl.

Minister a sigui bisa ku den su  maneho aktual, e ministerio mester keda reinforsá dor di mas kontròl. Mas personal, métodonan mas moderno i instrumento pa kontrolá. GMN tin un reto relashoná ku  kantidat di personal dor di e kantidat di persona ku a bai ku VVU (Vrijwillige Vervroegde Uitstroom). Di kada 3 persona ku bai ku VVU, gobièrnu por tuma 1 persona.

Minister a sigui bisa di ta tuma e kasonan di karni kaduká hopi na serio. Pasobra el a tuma algun desishon manera: Resientemente personal di THZ (Technische Higienische Zaken) a haña treinen di método di kontrol di rísiko internashonal HACCP. E konsepto di lei di karni i galiña ta den proseso. Tambe tin intenshon pa amplia e personal di kontrol di GMN. Tur esaki lo bai yuda pa sigui salbaguardiá salu di nos pueblo. Ademas lo bai intensivá supervishon i kontròl. Esaki lo sosodé dor di pone kontròl bou di inspekshon di salubridat. Esaki ta un desishon ku resientemente a keda tumá den konseho di minister. Esaki ta nifiká ku awor en adelante, ta inspekshon di salubridat lo kordiná e supervishon i kontròl ku asistensia di personal di THZ. E personal aki lo haña status di outoridat di inspekshon. Tambe supervishon di mantenshon di órden lo keda hasi riba lugánan di importashon i di benta, minister a indiká finalmente.