WILLEMSTAD.-  Awe ta kuminsá vakuná ku Moderna i na mes momento tur ku tin di pasa nan di dos dósis di Pfizer tin di bai na Marine basis na Parera. Esaki ta importante pa tur hende ku tin di tuma nan di dos dósis di Pfizer. Ta usa solamente Marine basis na Parera pa asina evitá konfushon miéntras ku awe ta kuminsá usa e vakuna Moderna ku por sierto tin e  mesun efektonan ku Pfizer.

Gobièrnu ta informá ku entrante awe djaluna 12 di aprel, tur persona ku tin un sita pa risibí e di dos dósis di Pfizer, mester akudí pa esaki na Marine basis Parera entre 7:30’or di mainta pa 2’or di atardi. Esaki ta nifiká ku e di dos dósis di Pfizer ta keda atministrá únikamente na Marine basis Parera pero tambe e ta nifiká ku tur persona ku tin sita pa vakuná na un orario despues di 2’or di mèrdia tambe mester akudí entre 7:30’or di mainta pa 2’or di mèrdia. E fecha pa e sita, ta keda igual.

Manera indiká anteriormente, tur esnan ku a risibí un sita despues di 6 siman pa e di dos dósis di Pfizer, próksimamente lo bai haña un fecha nobo via mail ku lapso di 3 siman (21 dia) entre e dósisnan.

Tur persona ku tin sita pa nan promé dósis di e vakuna kontra COVID-19 entrante awe djaluna 12 di aprel 2021, lo risibí e vakuna di Moderna. E sitanan akí ta kontinuá na e diferente otro Sentronan di Vakunashon segun e fecha i orario di kada persona su sita.

Relashoná ku e situashon ku a surgi djasabra na momentu ku algun persona, enpartikular hende grandi mester a pasa nan vakuna na Poli, a resultá ku vakuna a kaba. E situashon a kousa basta konsternashon ya ku ta hende grandi i asta hende den ròlstul tabata sintá pa warda nan vakuna na Poli na Sehos.

Pero parse ku e situashon a keda solushoná, ayera mes e personanan ei por a bai pasa nan vakuna na Poli mes bèk òf na Sambil. I pa esun ku no a bai bèk mester yama 9345 pa sa ki dia nan tin di bai.

(Foto Dick Drayer)