WILLEMSTAD.- E dianan aki Kuerpo Polisial no ta pasando su mihó tempunan. Den kurso di awe djabièrnè outoridatnan a detené un otro agente polisial. Djaweps dia 29 di novèmber 2018 alrededor di 20.30’or, Personal di e Departamento di Asuntunan Interno di Kuerpo Polisial Kòrsou, a detené e agente polisial, e hòmber R.J. di 35 aña di edat nase na Kòrsou, pa un kaso kontra di moral. Djabièrnè dia 30 di novèmber alrededor di 08.15’or, Personal di e Departamento di Asuntunan Interno di Kuerpo Polisial Kòrsou, a detené e agente polisial, e hòmber S.S. di 44 aña di edat nase na Kòrsou, sospechá di ta kómplise den un kaso di trafikashon di hende. Ta bon pa enfatisá ku kada un di e kasonan aki ta separá i no tin ningun indikashon ku nan tin di aber ku otro.

Kuerpo Polisial ta lamentá detenshon di algun di su miembronan, sigur den un lapso di tempu asina kòrtiku. Pero na mes momentu ke manda un señal hopi kla, ku no opstante ku te ainda e koleganan aki tin e status di sospechoso, ku no ta aseptá ni permití ningun komportashon kontra di lei ni reglanan di e organisashon. Maneho di Kuerpo ta mira e echo aki mas komo un outo purifikashon di e kuerpo mes i ke demostrá na komunidat, ku e ta para pa integridat. Polis tin e deber di duna komunidat e konfiansa pa aserk’é den tur libertat, pa huntu nos kombatí kriminalidat i mantené òrdu den nos komunidat. EXTRA tin informashon ku tin polis ku a keda detené ku a rekobrá nan libertat, mas detaye den edishon di EXTRA.